Korea linük anati arrtsü nung tebilemtsü ken o jembitsü mulung

Panmunjom, Aenjeti 9 : Korea linük ana sadangtsüba, demilitarised zone nung aliba Panmunjom yimtsüng nung Aenjeti 9, 2018 nü South aser North Korean ketdangsertem senden amenba mapang tangokba noksa nung angur.

Seoul, Aenjeti 09 (Agencies): Küm ana buba nung North aser South Korea tsüngta ketdangsertem senden amenba sülen arrtsü nung tebilemtsü ken o jembitsü asoshi mitkartem senden amentsü mulungogo.
South Korea nung Tsüklai (February) ita 2018 Winter Olympic Games aliba mapang shilem agitsüpur yoktsü asoshi North Korea-i mulung.
Kasa senden nung küm ana tejaklen ‘military hotline’ shibanga aliba tanaben lapoktsü asoshia tezüngzüktep agiogo, ta South Korea sorkari ashi.
Saka denuclearisation onük nung North nungi arurtemi memulung, ta South Korea-i ashi.
Senden anogo ka amenba sülen linük ana külemi osang sangdongba nung mitkar tebilemtsü samadaktsütsü asoshi yimjung ken o jembitsü mulungba jangjashitsü.
2018 Winter Olympics nung National Olympic Committee delegation, athletes, cheerleaders, art performer, terepranger, taekwondo sayuba telok aser osangbenertem yoktsü asoshi North Korea-i mulungogo aser South Korea-i nüngdakba teyari balala agütsütsü.
Kasa sangdong nungsa mejangjaba maparen kar indang ken o jembitsü aser tesendaktep tajungba kümdaktsütsü mechi linük ana nungi temaba ketdangsertem senden amentsü shisema lir.
South-i tebilemtsü tali kümdaktsüba inyakyim anentsü asoshi North dang asüngdang, aser peninsula nung yimjung lidaktsütsü ya kanga nüngdak, ta North-ia mulunga agizük, ta South Korea sorkar indang sangdong ka ajanga ashi.
Iba senden amenba indang osang tejangja kar South Korea ketdangsertemi sayaba nung:
* 2006 Winter Olympics nung ama Pyeongchang nung iba asayamung lapokba sentong nung Korea linük anaprong nungi saisapongertem külemi jajatsü asoshi South Korea-i asüngdang.
* Korean War ajanga balala kümdaktsür aliba kibongtem ya Lunar New Year mapang longjemdaktsütsü asoshi South Korea-i ken o benok – iba otsü ya linük anaprong asoshi temulung raksaba otsü ka lir – koba Winter Olympics mapang ajurur.
* Olympics nung North Korea-i shilem agitettsü mechi UN den angatettepa South Korea-i tenokdangbatem khen asoshi agiena atatsü, ta South-i ashi.
Saka item onüktem nung North Korea-i telangzüba agütsüba mejangjateti lir.
Iba senden tenzüka jembiba mapang, North Korea nunger delegation nung tekolakba, Ri Son-gwon ya telok ka nunga maden amai jembi. Iba senden ajanga küm tasen nung sempet ajung bener arutsü asoshi imlar, ta pai ashi aser North Korea-i kanga süoki ia nokdaker, ta shisem.
Linük ana tsüngta iba senden ya linük ana tsüngta arrtsü nung aliba demilitarized zone (DMZ) nung Panmunjom “peace village” nung amen.
Linük anaprong nungi ketdangser pongu-ngu arua iba senden nung aden aser linük anaprong indang leniri parnok jembishinü ya CCTV ajanga reprang, ta osang ajanga ashir.
Küm tasenba nung jembiba mapang, Olympics nung shilem agitsü asoshi linük nungi saisapongertem yoktsü bilema lir, ta North Korea lenir, Kim Jong-un-i ashi. South Korea indang Olympics tekolakbaia North Korea nungi aruba saisapongertem pelashishia agizüktsü, ta taoka küm shia lir.
Kim indang temelenshi ngua South-i Olympics nung North shilem agitsü asoshi temaba jenjang nung ketdangsertem senden amentsü asüngdang, saka US aser South Korea longjemer ‘military exercise’ agiba ya asayamung metembang tashi atsüngina atatsü mulung nungang linük ana tsüngta sendem amenba nung shilem agitsü, ta North-i shia liasü.
North Korea indang sentong ya US aser South Korea tesendaktep sadangtsütsü asoshi meranger südi, ta US nung teshisadanger kari ashir.