KüBu Mapa – Yohan 4:31-38

“Anungji nenoki aluruba Kibuba dang, pa pei alurudaki nübu yoktsü sarasademang.” (Mt. 9:38).
Asenok ajak tanela alu ruba Tebu mapa nung atentsüla. Tangar kümzüktsü asoshi asenok kümzük. Samaa aliba Pa dangi anir arutsü Tsüngremi aginer. Samaba san nungi o entepba jembir külen Yisui ashi, “Anungji item tilatem rongnung ka danga samatsü kotak nung aliba nenok Tebui memelunger” (Mt. 18:14; 1 Tim. 2:3-5). Yisuji shidakba chinilashi, saka chinilashi atemerji Tebu lir ta bilemtetang (Yn. 15:1). Tejang atangbaji shidakba nütsüngji lir ta asenok dang sayur. Tejang atangba jagi Tebu sentsüwangshir ta angatetang (t.8). Mapa tajung ajak nükjitongji kotak nung aliba Tebu sentsüwangshidaktsütsüba lir (Mt. 5:16).
Yisui tanela anir aruba aser sayutsüngiba alu ruba mapa den medemdanga jembi. Aluruba Kiburji Tebu aser asenoki Pa dang alururtem nübu yokang ta sarasademtsüla (Mt. 9:37-38). Isaia mangdang nung Tebui ajabaji Asem tenüng nung aja: “Ni shiba yoktsü aser onok tenüng nung shiba aotsü?” (Isaiah 6:6,8).
Yimli asoshi Tebui Techir dang kintem tekümtet asoshi pa sarasademtsü ashi: “Kü dang meshiang, aser kintemji Ni ne nem senmang asütsü, aser alima tatem tashi ne meyong asütsü agütsüdi” (T. Ken 2:8). Tanebtsü agütsüba aser temenen tanela aritokba nung dang asenoki pelaa malitsüla. Asenok tenüng kotak nung Tebu den, shiba “Kotak aser Ali Kibur” lir Pa den züluoka alibaji dang teti asoshi lir (Lk. 10:17-22). Asenok telok tila ka dang süaka, asenok nem yimliji agütsütsü Tebui mulungba lir (Lk. 12:32). Asenoki metsübui tasü itta kuli asütsüla kechiaser alu shijak kata Pai memeteti ali nung metsüker (Mt. 10:27-29).
Shirnok pastor mapa nung lir parnoki Tebu aser san tesendaktepji mamatoktsüla. Yisui ashi, Pa Sannüker tajung. Ano Pai ashi, Tebui Pa nem santemji agütsü (Yn. 10:14,29). Korint arogo pastortem puküm nung telemsa adoker alidang Pauli ashi, “Ajak nenok meyong, aser nenok Khrista meyong; aser Khrista Tsüngrem meyong” (1 Kor. 3:4, 21-23). Ibai bilemtettsü koda tongtipang. “Pa ajak madak, aser ajak ajanga, aser ajak nung lir” (Efesa 4:6). Asenok rongnung telungjem aliba dak alema kechai yaritsü makok (t.3).
Kibuba Yisu, Na Tebu dak lia, aser Tebu ne dak lia lungjemer kintem tekümtet asoshi mapa inyakba ama alima nung onok lungjemer Nai tenyaba mapa inyaktsü yariang. Amen.