Lalit kinüngtsü yaribaji ozüng alema süra, ni aibelenogo: Sushma

New Delhi, August 06 (Agencies): Tanü Lok Sabha senden nung External Affairs Minister Sushma Swaraj-i, lai Lalit Modi masü, saka pa kinüngtsü cancer tashitak agi shiranga alila yari, ta ashiba den külemi, Sonia Gandhi-ia iba ama tensa kaji ajuru ka asü nunga koma inyakla, ta shiogo.

Sushma-i, Lalit Modi nem visa agütsütsü asoshi lai UK sorkar dak mebenok mesüra memepishi, saka iba telemtetbaji UK nem dang toktsü, ta ashi.

Taoba mapang IPL mendenbuba Lalit Modi yariba ken o nung opposition party temi la minister menden nungi alutsü akhanger, aser ibaji ajanga Parliament senden junga makateti aridagi aser tanü lai, opposition nung medemertemi la anema noktaker aser iba onük nung lai sandong agütsütsü asoshi memelunger, ta ashi.

July 21, 2015 nü Parliament senden tenzükba anogo nungi lai sangdong ka agütsütsü aser la anema tai tonglokja alibatemji tai ta kuli ashitsü atema ata-a liasü, ta laisa ashi.

Senden nung tashi nung aliba party züngsemtemi la oji pela agizük saka lungkak aita senden nung madener Congress aser opposition party tem züngsem senden nung maliasü.

“Ni anema tai tonglokja alirtem dang, item tai tonglokja aliba asoshi kuli ama document ka, chit ka aser e-mail ka agütsütsü ni jazüker,” ta ashi.

Foreign minister Sushma-isa ashiba agi, lai British sorkar dang pa (Lalit Modi) Portugal-i oa tashitak tamajung agi shiranga alila pa kinüngtsü semdangtsü asoshi pa nem visa agütsüra ibaji ajanga iba linük den tesentaktep mekongshitsü, ta dang ashi.

Portugal doctor tem report aser Modi kinüngtsü sangdong zünga ashiba sülen Sushma-i, “Pa kinüngtsüji tesüiba küm 17 tashi cancer agi shiranger aser iba tashitak agi 10benbuba shiranger. Ni ya asüngdangner, ni ajuruba ama kasa tensa ajuru nunga Sonia Gandhi-ia kechi inyakla (?) La (Modi kinüngtsü) südaktsütsü asoshi lai (Sonia) odang toktsütsü asü,” ta ashi.

“Modi kinüngtsü ama tetsür ka yaribaji temzüng alema asünungbo, ni iba aibelen inyakogo ta ni House dang nangzüker. Iba dak alang temerenshi Parliament-i kü nem agüjang,” ta External Affairs Minister-isa ashi.

“Ni kechi koda inyak, kechisüba ajanga inyak, ta nüburtemi kü dang asüngdanger, saka ni kechi inyak ibaji tama kü dang shiang. Ni pa (Lalit Modi) nem senotsü tajangzük agütsü asü (?) Pa India nungi jena aotsü atema ni yari asü (?) Pa visa angutsü atema ni yari asü (?) Iba telemtetbaji ni UK sorkar nem toktsü. Ni parnok dang ashibaji, meimchir dang temeim sayuba nung jemdaker inyak,” ta lai ashi.

Opposition menden tazüng aliba dak sentakba nung lai, parnok maliba maongka agia lai sangdong ka agütsür masü, saka iba onük nung o atsüteptsü atema parnok jazüker dang lir, kechiyong lai sangdong ka agütsütsü atema mapang talangka ataogo, ta ashi.