Lanur Khrista Asoshi – Yeremia 1:1-19

“Asangurtem nenok tashi tait, aser Tsüngrem O nenok dak alir, aser nenoki tamajungba akok nung ni nenok dangi züluogo.” (1 Yn. 2:14).
Bartholomeus Ziegenbalg (1682-1719) Germany nunger mezüngbuba Indiai missionary aru shibai Tamil oshi nung Laishiba meyip, pa July 9 nung aso. Pa küm 16 tain alidang Khrista nem pa taküm bendanga agütsü, tashi angaba nung tamang katetta Tsüngrem tenzük aser küm 37 nung asü. Pai anir merangba ajanga Asia nung mezüngbuba Laishibaji Tamil oshi nung meyipa adok. Kodang Tsüngremi Yerimia aja, pai langzü, “Ah, Kibuba! Ajiang, ni jembitsü makok, kechiaser ni tanur ka dang lir” (Yr. 1:6). Saka Tsüngremi pa melenshitsü, “Ni tanur ka dang ta teshi.” Pai item kuli tenet ajanga kechiba Yerimiai Pai tenyaba mangatsüla ta ashi.
1) Ni na shimtet!
“Ni na tepok nung meyangludang Ni na metetta liasü, aser na masodang yongi Ni na meshiteta yutsü, kintem dangi ainkar ka asütsü NI na shimtet” (t.5).
2) Ni na yoker
“Ni na shir dangi yoker na aotsüla” (t.7).
3) Ni ne den arutsü
“Parnok tetsübu: kechiyong na kümzüktsü Ni ne den lir” (t.8).
4) Ni na sayutsü
“Ajiang Ni Kü Otem ne bang nung enoktsüogo” (t.9)
5) Ni ne nem tashi agütsür
“Reprangang, tanü kintem madak aser yimtitem madak, atsütettsü aser raksatsü, samatsütsü aser meküptoktsü, yanglutsü aser atemtsü Ni na yutsür” (t.10).
6) Ni na anitsü
“Ano Kibuba O kü dangi jembia aru… Ni parnok anema O bendangtsü.” (t.11-16).
7) Ni na tashi itdaktsütsü
“Ni na merang tongshi ka aser yongmen yin jara kümdaktsüogo.” (t.17-19).
Kibuba Yisu, Yerimia dang nangzükba ama tanü iba tenangzükba ni asoshi lir ta angatetta Nai tenyaba nung tashi angatsü yariang. Amen.