Lanurtemi saisapong nung temulong agutsütsüla

~ L. Kika Pongener.

Tanü putu nung saisapong (Games and Sports) ya kangasa tongtipang shilem ka kümadokogo. Govt. mapa mesüra Company mapa nungsa meinyakaka, mesüra tazüngba degree tulu meliaka, saisapong nung National level aser International level tashi nung junga asayateter-tembo, ayongayonga chiyunga-jema, takar küma, kibong aser taküm mesüa anisüngzüka alitsüba mapa tajung rongnung ka kümadokogo. Asen Naga nunger balaka kaketshir tazünger ajunga nükjidongji kobala lenmang nung züngdir züngaka, degree ngua zünger kulen sorkar mapa ka bushir, itasen chia taküm mesua alitsü, ibala nükjidong nungji dang rangloker azünger. Aji oda, tazünger ajunga sorkar mapa agi atatsü masuji sorkar mapa ka mengura, degree tulu zünger machi-majemtsü chia-jema taküm lisaa lia tia raksaba lanur tajung aika ajuruogo. Lanur ka degree tulu ngua azüngtsüsa pa/la dak tekolok shisatsü maka-aka, mesüra pa/la dak tangar ama mapa tulu inyaktettsüsa asa-lendong shisatsü meliaka, pa/la temang shi, asoajen aser tashi (Physica health) agi tangar menepa saisapong asayatettsüsa koka lira, saisapong nung temulong agütsüa, nendaka, meranga inyaknung, iba mapa jagi pa/la taküm nung anisungzüka, ayongayonga chiyunga-jema takar küma alitsü takoktsü lenmang aisu lir. Taoba ita nung India nung host süa asayaba “Under-17 Football World Cup” Indian team nung Manipur state nungibo parnok pezü-pongu shi ka dena liasu, ashiko Meghalaya aser Mizoram state nungia karbo densema alitsü sudi. Senior Indian Foot ball team nung-a Manipur, Meghalaya aser Mizoram nungibo asayar karbo densema lir, saka ni aibelener ka mesüra asen Nagaland state nungibo asayar ka danga densema mali südi. India nung Foot ball asaya “Hero India Super Leagüe” (HISL) tenzüker kulen nungi India nunger asayartema Club balala nungi asayatsüsa maongka angur. Ano aji dang masü Indian Premier League (IPL) Cricket asaya nung ya asen Naga nungerbo asayar ka danga dena mali, kokrabang cricket asaya nung ya-a asen Naga nunger lanurtemi-a temulong agütsütsüla.
Hero India Football Super League aser Indian Premier League, Cricket asayaba nung ya India nunger asayartem aika crore meden tashi agi Club-temi alizükba lir. Manipur, Mizoram aser Meghalaya nungi Football asayartem club balala-i sen lakh 50-60 tashi agi alizükba asayar tajung karbo densema lir. Surabangla asen Naga nunger-a küm tepiyong melentepa District ajak nung Foot ball tournament balala ayongzüka asayar, trophy balala ayongzüka asayar, saka National level aser International level tashi nung asayar kata madoktsüsa ya kechi tai ? Asen Naga nunger asoajen, temangshi aser tashi agi tangar memeneper asu koda ? India lima nung industry-tem aser Company-tem rongnungi rongsenkettzüng nung jenjang tajungtem aika dang lir, aser item rongnung “Indian Film Industry” aser “Board of Control for Criket in India” (BCCI), item ya asutsü sudi.
Sorkar den saku item Industry & Company-tem yagi nisung aika nem employment agütsüteter aser sorkar atema-a nükdang tajung kaka lir. Mary Kom Manipuri state nung yimtsüng tilaka, aser sensaker aluyimer kibong ka nungi, ajisuaka International level tashi nung Boxing asayaa medal ngutetba ajanga tanubo alima nung nungtugu tetsür ka kümogo. Manipuri sorkar-i Police department nung Deputy Superintendent of Police (DSP) rank jenjang tashi agütsüogo, la kija-i Boxing academay tashi lapoktettsüsa rongsenkettzüng jenjang junga kümogo. Mahindra Singh Dhoni Criket dang junga asayatetba ajanga tanubo alima nung takar tetsüdi aser nungtuko nisung ka kümogo, par lima nung Cricket Academy tashi lapoktettsüsa rongkettzüng jenjang junga kümogo. Mongin Criket asayar Tendulkar alima nung nungtugu nisung aser rongsenkettzüng nung takar akümba dang masü, Rajya Sabha nung Member of Parliament (MP) menden tashi maongka agüja tang temendak lir. Tang iba 21st century nung alima nung nungtugu nisung rongnung Argentina nunger Leonel Messi aser Portugal nunger Criatiano Ronaldo Football asayar mongin tena ya asutsü. Alima nung nungtugu Football Club-temi tena sen dollar million aika agi alizüker, oda tena tetsüng temepu ana nungji sen dollar million jagi lemsar agütsü nunga million aikasa atatsü sudi. Surabangla tena tetsüng temepu yabo oda tangar dang nungi balaka alakteta “Super giant Feet” aden asü, koda ? item ajak ya tanga kecha agia masu, saka pei dak aketba sempet angateter, bendanga agüja, nentaka, meranga inyakba ajanga aazükba dang lir. Asen Naga nunger lanurtem-ia pei dak aketba sempet angateter, temulong agüja, nendaka, meranga inyaker, alima nung nungtugu asayar ka-ka akümtsü, aser sorkar dak memetaloki, pei taküm aser kibong mesüa, takar küma anisungzüka alitsü aser tangar ama alima nübor aser lokti nem teyari agüja aliba taküm ka-ka asütsü meranga arishia inyaktsüla.
Ao kin nungi Dr.T.Ao-i India ajunga nungi mezüngbuba Indian Olympic Football team pa captain sür 1948 küm London nung asayaba, ibaji Naga nunger lanurtem asoshi puti otsü asutsü. Aji oda, pa tenüng jaloka Mokochung Jila nung tongtipang mapa tajung kar danga inyaktet asübo, ibaji asen Aor asoshi dang masü, saka Naga nunger ajunga atema “NUNGO” mapa asutsü. Anungji Aotsür Aor tashitemetetertemi anir Mokokchung Jila nung Dr.T.Ao nüngo, pa tenüng jaloka asayadak moapu (Stadium) tajung ka aser Dr.T Ao Sports Academy & Institute tajung ka lapoktsü mangdang ayutsüla. Aor constituency-10 nungi adokba MLA-temi anir takar, tulur aser tashir ajaki peipei akokba shilem agia, iba mapaji asangsang nung ataloktsü asoshi merangtepa inyaktsü ajungshir. Iba mapaji shidak inyaktetra, iba Stadium aser Institute nung jagi asayar tajung karbo adoktsü aser iba Institute nungji lanur zünger mapa makar ishikabo mapa angutsü. North East India nung State ti (8) rongnung Assam State sülenbo Nagaland State angu, anungji terenlok mapa kechisarena ajunga nung Assam nunger sülenbo Naga nunger asütsüla, ajisüaka asen sülen State angur State-tem nem kechisarena ajak nung ajatetdaktsüogo.
Tanü tashi nung asen Naga lima nung asayadak moapu (Stadium) tajung ka danga yangerteta makaba ajanga Inter State Level aser National Level tashi nunga sünga Games & Sports Tournament tila ka danga Host mesüteter. Asen Naga nunger lanur rongnungi National level aser International level tashi nung asayar kata madoktsüsa ya kechi tai ta bushidangra, tongtipangba kuli kaji tanü tashi asen Naga lima nung asayadak moapu tetemsü tajung kata yangluteta maka. Asayar tajung adoktsü atema tongtipangbaji Stadium, Infractures & Facilities, item ajunga peria akatsüla. Iba dak alaka, küm shia mapang shia Tournament & Trophy asaya tapu balala ayongzüka akatsüla. NSF, MDFA aser itemla ama lokti tentet balala-i acha-ayanga District shia nung mapang shia Trophy & Tournament tapu tapu ayongzüka akar, aser tesem balala nungi asayar tajung aika anidena asayar. Ajisüaka state level nung asayaba dak alaka National aser International level tashi nung asayatsüsa asen Naga nunger lanurtem rongnungi asayar tajung kata madoker, kechiyong asen Naga nunger lanurtem dak nendaka meranga inyakba shisatsü mali. Ano aji dang masu, Naga nunger lanurtem dak temesepba chiyungtsü achiba, libaliro aser jaklaliro mazüoktetba aser tangar kübok melitetba, item amala jakla yimya tamajung aika keta lir. Asaya nung mongin akümtsü asoshi asaya nung ajungba dang masü, saka item jakla yimya azüoka asüngteta litet nung dang asayar tajung ka kümtettsü. Ajak dak alaka tangar kin tsüngdang taaktsüka, Mokokchung nung Football tournament asayaba shia asayar aser terepranger karbo teti atema taküm tenük-telen lemtatsüsa, mesüra karbo taküma dena aotsüsa süng-long aser injang-bomb tashi amshia rongrongshishia raratepba ataloker. Sürabangla Tournament ayongzükba ya tangar amaji tayonger telok-a ajangzüka rongsenketzüng nung jenjang tajungba akümtsü, asayartema tangar menepa national aser international level tashi asayatettsüsa akümtsü, aser tereprangertema südok-sünema mapang indoka pelateptsüba nükjidong nung asayar asü, mesüra yimyim, telok telok aser club-club tsüngda nung rarateptsüba nükjidong nung asayar ? Tangarbo saisapong nung temulong agütsüa, nendaka, meranga inyakba ajanga sorkar dak memetaloki, pei taküm, kibong mesüa anisüngzüka jangratema alir, rongsenkettzüng nung jenjang tajungba kümer tangar nema teyari agütsütettsüsa liteter aser alima nung nungtugu nisung akümer. Ajisüaka, asenokbo saisapong ajanga yim o yim na, telok telok aser club club tsüngda nung tsükchitepa rarateptsüsa dang inyakteter no ? Sürabangla saisapong ayongzükba ajanga tajangzük melena rarabangsen aser tsükchitepa alidang nungibo tournament ya mayongzükang tajungba asütsü. Asayar mongin ka atema tongtipang temetettsü kaji takok angur asü mangur ta asübaji tongtipangba masü, saka junga asayateter asü masayateter ta asübaji tongtipangba lir. Ashiko na dener asayaba team jagi takokbo angutsü akok, saka takok angubaji junga asayatetba agi akok asü mesüra tashiyim (rough) agi asayaba ajanga takokji angu ? Mesüra asaya inyakyim dak aketba tzüzüng-ozüng (Rules and Regulation) shidak benshia asayaba agi takokji angu asü, mesüra asayaba inyakyim dak maketba yimyatem amshia (Unfairmeans) asayaba ajanga takokji angu? Ibalaji-ang kangasa tongtipangba lir. Tim masüba yimyatem benshia asayaba agi takok anguba dang nungibo, timyimi yimya tajung agi asayaa tamakok anguba-ang konang tuluba ta angatetdi. Asenok rarabangsen adokba tongtipangba ya kechi südir süaka takok angutsübasa ta arishitepba ajanga rarabangsen ya teimba ka ataloker. Atangji, asayabaji takok angutsü atema toktepa asayar, ajia shingaia nunga ta mashir, saka takok anguba dang nungibo, yimya tajung (Discipline) agi junga asayaba ajanga dang asayar taküm kaji nungtuko akümtsü, aser asaya reprangertema jangratema reprangdaktsür. Anungji Naga nunger lanurtem ajaki sorkar dak dang metaloker alitsü mebilemi, pei dak aketba sempet angateter, peisasa nendaka meranga inyaka asaya (Games & Sports) nung temulong agütsür, asayar mongin ka-ka kümer, peisasa pei taküm, kibong mesüa alitsü merangang ta lanurtem ajak ajungshir.