Libya anasa rong meküboka nisung 90 shi süogo

Geneva/Tripoli, Feb 02 (Agencies) : Hokolbar anepdang yakta Libya tzüyim nung rong ka meküboka nigun tekur shi süogo südi ta temulung malem bilemdagi.
Nisung asembo tzü wadanga adoka kümzükogo aser tasümang ter tzükümlen pongteta liasü, ta International Organisation for Migration (IOM) ajanga metetdaktsü.
Iba rong lendong nungi kümzükertemi teyaritepertem dang ashiba agi, rong nung alirtemji Pakistan nungertem teimba ser liasü; parnokji North Africa nungi Italy bushia miima aortem liasü, ta Tunis yimti nungi IOM otongdatsür Olivia Headon-i Geneva osang den jembidang metetdaktsü.
“Rong mekübokba mapang nisung tekur shibo süogo südi saka kwika asüar ibaji bushisüngdanger külenang tejangja metetdaktsü,” ta laisa olen ka shisem.
Iba lendong atalokli Libya anüolen tsütsü Zurawa yimti nungi security official-temi ashiba agi, Libyan nunger ana aser Pakistan nunger ka tabo rong nung jagi kümzükogo.
Pakistan nungertem teimba ser tasümang terbo ngutetogo ta angazüker saka parnoki osang tejangjabo mashi.
Libya o Tunisia na arrtsülen Zurawa nungi mapang shia temelaba magii nüburtem jena aotsü meranger saka Italy aser European Union ajanga mepishiba nung ajemdaker tanükertemi nüburtemji meyoki nokdangtsü meranger.
Taoba küm pezü tsüngda nisung 600,000 dak tema Libya nungi Italy tonga ogo ta bilemdagi.