Linük asüngsashi atema inyaktsü: Yechury

Kolkata, November 18 (Agencies): BJP sorkari linük nung revolutionary forces anema onük pezü nung inyaker, anungji linük asüngsashitsü atema party tashi itshitsü asoshi inyaktsü, ta tanü CPI-M General Secretary, Sitaram Yechury-i metetdaktsü.
Russain Revolution sülen küm 100 ajungba anogomong nung Kolkata nung sentong ka nung jembidang Yechury-i, “Iba linük nung revolutionary forces tashi meitdaktsütsü atema tang aliba sorkari onük pezü nung inyaker, aser item onüktemji: colonial forces; capitalists tajangzük ngudaktsütsü atema rongsenkettsüng mapatongtem; linük sobaliba raksatsüba aser democratic inyakyim raksatsüba lir. Tang yangi iba yimtenren tensa lir,” ta metetdaktsü.
“Anungji asenoki iba ama tensa ka nung temelenshi adokdakja asüngsashinüra asenoki asen hadirtem tashi itshidaktsütsüla. Iba hadirji asen party lir. Nisungtem longjemdaktsütsü aser party longjemtsü atema hadir ji left party lir,” ta paisa ashi.
Yechury-isa, Centre sorkari Parliament nung “Gujarat model” benoka inyaker aser asükwa mongpu Parliament akatsü memelar, ta aitsü.
Centre nung tashi aliba party-i parliamentary inyakyim melenshia Gujarat aser Himachal Pradesh assembly election nung rangloker inyaker, ta paisa aitsü. “Election magidang parnoki Parliament mayongzükner, kechiyong parliament senden ayongzükra Amit Shah’er jabaso Jay Shah ochimashi ken o, Vyapam ochimashi, demonetisation aser GST onükatem benoka jembitsü. Palrnoki linük indang parliamentary inyakyim raksatsür,” ta paisa aitsü.
Russian Revolution indang metetdakja pai, tang linük nung lenla ajaklen mepetmesü aliba nungi Left wing party temi maongka agia temelenshi atema meinyakteter. Asen hadir tashi itshi nungang iba maongka agia inyaktettsü,” ta ashi.