Lisopur Ola (Indigenous Voice)

– N.M.Jamir, Advocate,
Chairman, Nagaland Indigenous People’s Forum.

Nagaland ya India sorkar kübok December 1, 1963 anogo nung State ka küma züngok.Nagaland State ya yimten tenangzüktetba küli 16 Points Agreement ajanga State aküm. 16 Points ya Naga lisopur kintem nungi tongti lenir temi shisa opang lemsatepa pangjemteper renem aser iba 16 Points terenemba Mokokchung nung Naga Peoples Convention 3rd Session 22nd – 26th October, 1959 nung alidang renema agizüka ayu aser iba terenembaji India Sorkar den Naga yimten latettsü atema tongti onuk tem liasü. Iba sullen 16 Points ji 26th July 1960 anogo nung India Ato Kilonser (Prime Minister) nem Naga Peoples Convention lenir temi agütsü.
Nagaland State ya Naga kin ter pezü sangeri yatetta aküm aser iba ya ostula obula nungi asen tetsü tasoli lir. Item kin temji ; 1. Angami 2. Ao 3. Sumi 4. Lotha 5. Chakeshang 6. Konyak 7. Sangtam 8. Chang 9. Yimchunger 10. Khiamnugan 11. Phom 12. Rengma 13. Pochury 14. Zeliang. Item dak alaka, Küki, Kachari, Garo aser Mikhir kintema Nagaland State nung lisopur lir.
United Nation sangdong ajanga ashiba agi lisopur (indigenous) kin tetezü yamai –
o Pei temeten küli tejangja akaba (Identity) aser ibaji kin-i külizüng sutetba.
o Yimsuyimpong aser otsü oren tejangja akaba
o Pei linuk aser lim akaba.
o Lokti libaliro, rongsenren aser yimten yimli ren balaka akaba.
o Tetsü taso O tejangja aser sobaliba akaba.
o Aser tangar dak nungi balaka loktilibaren lateta akaba.
Naga kin terpezüsanger ya otsüla obula nungi Nagaland State linuk, iba linuk nung ali tema aser telung nung aliba rongsentem aser iba nungi adokbatem madak kiburtem lir Iba temeten ya India Temzüng Article 371(A) ajanga kanga jangjajangja wazüka yuja lir.Tanu Nagaland lisopur atema tebilemtsü tongtipangbaji asen lima rongsenren (economy) renloktsü atema asen lima telung nung aliba ronngsen tem (mineral resources) koda achaayanga amshitsüla ya ka lir. Teyanglur Tsüngremi asen linuk balaka moaja lir aser itemji,ali telung nung alibatem ; totzü,ali mejang, senti long tapu balala, marble, granite, ceramic aser lime amala. Ano, tzü mopong tajung koba ajanga aonsotsü, sungjanglijang, aser sungolio tapu balalatem züsentetter. Anungji item temoatsütem tim tesu agi amshia asenoki Nagaland ya tejakleni aoba linuk ka yangertetsü lemang kanga sadema lir.Iba atema lisopurtemi mangdang aser nukla akaba lenir kanga nungdaka kümogo.
Tanü Nagaland nung zünger mapa mangur tem 68, 504 lir ta Employment Exchange Live Register 2016 December nung tejangja zülua lir.Sakasa iba tebilemtsü Sorkari kecha hau ta mali aser shirnok tewangsu menden (powerful chair) nung mena lir parnoki parnok sunutsü sua mapa tapu balala nung lisopur temeten razüker par mulongba nung maparen tapu balala nung tim mmesui anioker. Nagaland State ya lisopur temeten wazüka akaba State ka asü nung Tetuyuba (Notification NO APPT 18/6/67 dated 19.09.1987 ) ajanga Class III & IV (Non- Technical) mapatem ajak lisopur atema noklang nung noklang shilem (100%) wazüka yuja lir. Sakasa tawa 2013 nungi 2016 tashi nung Police Department nung III & IV grade mapa tapu balala nung Tzümarlongpar (Non-local) 239 anioka lir. Item mapatemji regular sanctioned post; Constable, Driver, Handyman, Painter, Cook,Jugali, Barber, Cobbler aser Water Carrier tem lir. Bushisungdanga aodang Police Department ajanga IGP (HQ) i ashiba agi item mapa temi ji Nagaland lisopurtemi meinyaktetter ta ashi. Police Departmenti item Tzümarlongpar temji Kerala, Maharasthra, Uttar Pradesh, Bihar, Nepal, West Bengal aser Assam linuk tem nungi bushia bener arua mapa nung anioka lir.Iba ochi mashi mapa tatem tonga bushitsü atema asen Ao lisopur Kaket Zülur aser lokti atema inyaker Changtongya nunger S.T.Yapang Lkr-I Gauhati High Court nung ken-o benoka lir (PIL case No 3 (K)/2017 S.T.Yapang Lkr -vs- State of Nagaland & others) Iba ken o tajungtiba nung tembangtetsü atema lisopur sarasadem aser teyari nungdaker. Ano, Appointment bo Ban ta State Sorkari ashir, saka Back-Door appointment bo anogoshia agütsür, iba atema lisopur mulungtet telok ACUAT ajanga Gauhati High Court nung ken o benoka lir. Kanga junger aser pelar.Item atema taoba Nagaland Minister ka den lemsatepa jembidang pai ashiba agi ”ashikelaker aser ochimasir temi lisopur temeten ajak samatsür ‘ ta ashi.
Rongsenren aser shishilembaba nung reprangdangra, asen Ao Kaketshir Mungdang (AKM) ajanga Survival Mokokchung inyakyim ya Dimapur jila nunga jungra bilemdanger tenzük nung koda. Dimapur yimti ya Nagaland atema shishilembadak tongtipangtiba aser Manipur aser Assam tesem kar atema-a Dimapur jila ya shishilembadak tongtipang lir. Asenok Nagaland lisopur temi Hongkong Market, Hazi Park , Shangrila, New Market aser shishilembadak tesem balala tem nung tokan kibur aser toakn tem nung mena shishilembatsüla, asenokia akoktsü ta bilemer.Saka asenok lisopuri shishilembaba nung tim tesu, Jenjang shitak nung shishilembatsüla (Fair trade practices) Asen Mokokchung jila nung tim mesui jenjang kanga tur atakteta shishilembaba küli aika angashir. Anungji aji melenshitsüla mesura tim mesui shishilembababa (Unfair trade practices) nung tapet temerenshi, senchi achitsü aser Trade License katitsütsü atema pangdaki ken o abentsü.Tongtepratepsu Opung züngya (Mobile Number # 8118956280)
Tawa International Yoga Day nu India kilonser Pradap Rudy Dimapur-i Skill Development project Nagaland nung lapoktsütsü atema aru, pai ashiba agi Skill Development project ya junga inyak nung bo Nagaland nung unemployment tebilemtsü ya melei akümtsü. Iba tayongzükba nung asenok lisopur lanurtemi koba tashi ka nung jangrapangra tashi ita ochi nung inyaktetsü !!!