Lokayukta tentettsü aser backdoor appointments agientsü akhanger

Nov 15, 2017 nü PCC-i State Civil Secretariat kima nung lungkak aitba sentong agidang tangokba noksa angur.

Kohima, November 15 (TYO): Nagaland sorkar atema ano public-i tejashi sayuba mapang ka ajuruogo aser ibaji tanü nungi State Civil Secretariat kima nung nisung noklang aita adenshir lungkak aitba lir.
Iba sentong ya Public Coordination Committee (PCC)-i ketdangsüa agir aser iba teloktep nung Against Corruption and Unabated Taxation (ACAUT), Public Service Aspirants aser tanga technical aspirant association tem dena lir.
Lungkak aitertemi Civil Secretariat office mapang lenmang anasa noktaker Parliamentary Secretary tem indang dena sorkar garitem süiba shia tezülubatem sayu aser temeten agüjang ta yimyim ayimoktsü.
“Nagaland nung ochimashi anema ozüng tajungtem nüngdaker – Lokayukata Bill”, “Civil services examination indang mains & interview marks lists sangdongang”, “Mapatemji sen agi masü saka tajungtiba asüba ajanga angutsüla”, “Tang aliba ochimashi yimsüsürtem dang nungibo mangko bushirtem tajungba liasü”, “Lanurtem ochimashi indang alar kümdaktsütsü atema len sayurtem ayatai”, “NPSC examinations ochishia agitsü kanga nüngdak”, “Mapa alirtem aser ayokertem ajak kasa dang ataktemtsü” aser “Lanurtemi ochishiba aser teindang tangatetba aginür, ochimashi yimsüsürtemi temenen dang lidaktsünür” olentem züluba placard amer parnoki lungkak ait.
PCC-i onük pezü takhangba agütsür aser itemji- a) Lokayukta tentettsüba, b) June 6, 2016 sülen backdoor appointments ajak anentsütsü aser October 26, 2017 Office Memorandum meyipa agitsü, c) Nagaland Public Service Commission (NPSC) nungi Class-III posts agienba meyipa bener arutsü aser d) NPSC-i agiba tatidang ajak indang marks, answer keys aser waiting lists sangdongtsü indang lir.
June 6, 2016 nü sorkari contractual appointments ajak nokdangtsü atema tetuyuba agütsü aser October 26 nü Office Memorandum nung Secretariat Assistants dak alaka Class-III posts (non-gazetted) ajak NPSC kübok madentsü atema osang metetdaktsü.
PCC-isa sorkar dang departmental recruitment board agientsü aser grade pay Rs.2800 den tajemba nung Class-III posts ajak State Selection Board (SSB) ka ajanga shimtsü asoshi tentetang ta takhangba agütsür.
SSB ji metentetdang posts ajakji open recruitment atema NPSC nem agüjang aser iba indang tatidangji interview melii written dang asütsüla, ta parnokisa takhangba agütsür.
Nagaland ama tamakok anguba state ka nung ochimashi ajanga nisunger tangatetba kokteta lir aser iba ama tensa ka nung sorkar ketdangsübaren nung tashishiteptsü melii inyaksangshitsü atema Lokayukta ka tentettsübaji kanga rongdak nüngdak kümogo, ta PCC-isa metetdaktsü.
Iba sentong nung ACAUT Nagaland, PSAN, Combined Technical Engineering Association, Agriculture Students Association, Kohima Baptist Pastors Fellowship, Kohima Municipal Wards Panchayat Association nungi züngsemtemi shilem agi.