MAAM-i Cancer Trust Fund atema ‘Winter Melody’ ayongzüker

Mokokchung, November 19 (TYO): Mokokchung Art and Aesthetic Management (MAAM)-i tan benjungmong mongpu tanela akasodakja December 12, 2017 aonung Imkongmeren Sports Complex, Mokokchung nung MAAM Cancer Trust Fund atema “Winter Melody” kenten sentong ka ayongzükogo, ta tanü sangdong ka ajanga metetdaktsü.
MAAM telok ya 2014 küm tenteta liasü, aser iba mapang nungjagi tenzüka iba teloki lokti atema mapa tajung aika inyaka arudar.
MAAM-i Miss Mokokchung Contest anaben ayongzüka agiba dak alia MAAM-i Care Foundation den senteper matamabensartem aser Imkongliba Memorial District Hospital, Mokokchung nung cancer tashidak agi shirangertem atema teyati mapa tajung inyaka arudar.
Winter Melody kenten sentong ya tongtibangsüa MAAM Cancer Trust Funds atema ayongzükogo.
Tanü Black & White restaurant, Mokokchung nung osangbenertem senden ka nung jembidang MAAM Tir, Asola Ozukum-i, “District aika atema Mokokchung jila ya tiyongtsü ka lir, aser treatment tajungba magitettsüsa makamaiter cancer agi shirangertem aika lir,” ta metetdaktsü.
Laisa, “MAAM-i sensakertem yariner aser onoki akokba tashi agi yariner, ibajiyongji onoki Cancer Trust Fund ka alitsü atema lemteta liasü aser tila ka dang süaka onoki lokti atema tajungtiba inyaktsü meranger,” ta metetdaktsü.
Winter Melody kenten sentong nung Mizoram nungi Rosy K. Remsamppuii, Osangtajung kentener telok, Samaro aser Incipit teloktemi shilem agitsü, iba dak alia chiyungtsü stall tema aika lapoktsü.
Winter Melody concert ticket jenjangji sen 1, 200 asütsü aser ticket ji item contacts ajanga angutsü: 9089555813/8731918363.