Maggi

Tanurtemi dang masü saka taintemia kanga sapua achiba aser talisa kijalirtemi chi melena achiba chiyongtsü, minute 2 nung dang mena sor chitetba Maggi noodles indang ashishitep osang adoker hopta ana shi arur. Iba ashishitep onük adoker asenoki anogoshia osang balala angashia arur, state kar nung enoktsü lateta aliba dang nungi talila enoksemba putetba osang aser ano kar nungbo kecha mongutetba osangtem angashidang asenok mangmangdaktsür. Iba onük atema Centre sorkari kanga süoki ia Food Safety and Standards Authority of India (FSSAI) nem ketdangsüa reprangdaktsür saka parnoki nungi tatembang oshidang ka ano magütsüi lir. Hokolbar nü FSSAIi Nestle dang Maggi indang tapu kar mayoktsü aser shishilemba masütsü atemabo tetuyuba ka agütsüogo aser Nestle company-ia Maggi meyoki atatsü telemtetba agiba sangoktsüogo. India nung iba onük adokba sülen June 5 nü Nepal sorkari Maggi noodles bener marutsü aser mayoktsü tetuyuba agütsüogo. Ano, June 6 nü United Kingdom nung Food Safety agency-i Maggi noodles kar tendangtsü telemtetba agi. Nestle UK-i yanglua ayokba Maggi chiyongtsütem nung tashishitsü kecha mali saka kümdangshitsü atema iba mapa ya inyaktsü ta Food Standards Agency (FSA)-i metetdaktsü. June 7 nü Bahrain-I par linük nung India nung yangluba Maggi noodles mayoktsü tenokdangba agütsüogo. Nestle-i parnok sasep nung aser ano independent lab ka nung chiyongtsütem tendangogo aser item tendangba nung India temzüngi melaba ama Maggi nung tashishitsü maliba bushitetogo ta kuli agütsüogo.Parnoki iba nung ajemdaker okadak temepishiba ken o benokogo, saka Maggi noodles indang onük ajanga Nestle company asoshi tenüng menük bener arutsüogo. Ajak dang tematibaji iba ashishitep onük ya India nunger consumer asoshi tongtipang tangazüktsü ka ama züngshitsüla. India nung alirtemi processed, packaged aser branded foods kanga sapur. Chiyongtsü nungji kechi enoka yanglu mebushidangi nisungtemi item amala chiyongtsü alia achiajemer. Maggi noodles nung enoka yangluba chiyongtsütem rongnung Lead dena mali saka tang tendangba nung Lead talila enoka aliba putetogo. Süra küm 20 shi tejaklen nungi India nung Maggi kanga sapua chiyonga arur sernung kodaser taseptsü nung ‘list of ingredients’ agüja aliba nung Lead zülua maliba mangu. Tan Maggi noodles ashishitep ken o nung Lead enoka yangluba putetba dang masü saka ano monosodium glutamate (MSG) ta ser tachitsü ka enoka aliba putet. Maggi taseptsü nung MSG enoka yangluba shia mali. Tang Nestle aser India nung bangdak ketdangsertem tsüngda okadak ken o benoker ka shitak, ka-ang shitak ta toktepyonga arudar aser okadaki komala oshidang ka agütsütsü meshiteti lir. Saka iba tatalokba ajanga India nunger consumer tem tali jeretperatsü aser kümdangshitsü asoshi tangatetba shisatsü ka arudaktsür südi ta bilemer. Tawa tu US nung chiyongtsü company tulu rongnung Kraft-i sangküm nungi parnoki yangluba chiyongtsütem nung artificial preservatives aser colours mamshitsü ta osang metetdaktsüogo. Ano, Chipotle ta ser chiyongtsü company kati mozütem amshia adokdaktsüba achiajemtsütem agi chiyongtsütem meyanglutsü telemtetba agiogo. Ano, North American market nung sandwich yangluba Subway company-i artificial flavours, colours & preservatives mamshitsü tametetdaktsüogo. Item company temi alia chia-ajemertemi aginüba ama chiyongtsütem yanglua ayoktsü meranger.Taküm March ita America nung nisung 360,000 den timbai tamaitsü tenüng zülua change.org petition ta ser telemtetba agia sangoktsüba nung ajemdaker Kraft company-ia telemtetbaji agi. Ajisüaka, India nung aliba packaged food market nung alia achirtem, chiyongtsü tendangertem aser sorkar kübok bangdak department tem tsüngda amalitep melii dang arur. Sepbanger ayokba chiyongtsütem nung kechi enoka lir ta nisungtemi merepranger aser nisung kari reprangbaji non-vegetarian food ta asüba nung brown dot aser vegetarian atema green dot aliba mettetsü atema dang repranger. Tanü Maggi noodles atema ashishiteper, ashiko shibai metet asüng company balalai yanglua ayokba chiyongtsütem tendanga aodang, tan dang nungi tetsübutsü aketba kulitem bushitettsü akok. Anungji, iba tatalokba nung asenoki tansütsü ama agir chiyongtsü mashii alia machitsü mesüra majemtsü merangdi. Talisa sepbanger aliba chiyongtsütem nung enoka yangluba osang tejangja metetba sülen ang asenoki alia achitsüla.