Manipur nung police-i kaketshir ka tepset

July 08, 2015 nü Imphal, Raj Bhavan kima tetsür police temi TG Higher Secondary School aser GP Women college kaketshir lungkak aitertem noktangtsü merangba noksa nung angur.

Imphal, July 08 (Agencies) : Bodbarnü Manipur nung Joint Committee on Inner Line Permit System-i anir lungkak aitba sentong ka nung police-i arishi küm 16 tain kaketshir ka tepset.
Tanü lungkak aitertem aser police tsüngda mangatettep adoka raradang Class XI nung azünger Sapam Robinhood kanga mejungi yiru aser pa Imphal nung nija mozü ki ka nung asü. Imphal nung atalokba lendong nungsa tetsürtem dena nisung 20 shi yiruogo.
Arunachal Pradesh, Nagaland aser Mizoram nung aliba ama Manipur nunga Inner Line Permit System tenzükang ta takhangba agüja lungkak aitdang iba lendong atalok.
Bodbarnü district administration-i greater Imphal nung curfew alitsü ozüng agütsüogo.
Nisung asüba osang angashiba sülen kaketshir telok aikati Chingmeirong nung aliba state assembly complex leni aotsü merang saka police-i parnok noktang.
Manipur nung tang assembly session tagidak lir aser lungkak aitertemi iba mapang ILP indang bill benoka agizüktsü takhangba agütsür.
Tesüiba anogo ishika Manipur nung Joint Committee-i anir Inner Line Permit System atema lungkak aitba sentong balala ayongzüka agiyonga arur.