Manipur taginübatem kümzüka ayutsü : Rajnath Singh

New Delhi, August 8 (Agencies) : Honibarnü Centre-i Manipur dang NSCN-IM den tatembang tenangzüktep agidang Manipur state indang taginübatem kümzüka ayutsü ta nangzükogo.

Iba tenangzükba ya Union Home Minister, Rajnath Singh-i Manipur Chief Minister, O Ibobi Singh dang ashi.

NSCN-IM den tatembang tenangzükba magidang tamasa Centre-i Northeast nungi chief minister tem den asüngdangyatsü ta Honibarnü Rajnath-isa Ibobi dang ashi.

Naga nunger aliba tesemtem ajak ka küma longjemtsüji tamakoktsü ta Centre-i NSCN-IM dang angateta shiogo, saka autonomous district council amala tashi talila agütsütsü, ta Rajnath-isa Ibobi dang ashi.

Parnok den asüngdangya kecha mesüi Hombarnü Centre-i NSCN-IM den yimjung tenangzüktep agi, ta Manipur den Assam aser Arunachal Pradesh Chief Minister temi Centre anema ola adoktsü tenzük.

NSCN-IM-i küm ishika tejaklen pei sasa yimsü süa alitsü takhangba agien aser iba sülen Manipur, Arunachal Pradesh aser Assam nung Naga nungertem aliba tesemtem ka akümtsü atema takhangba agüja arur. Ajisüaka, state asempronglai iba takhangba anema noktaker.

Home Minister Rajnath-i Ibobi dang ashiba agi, Hombarnü tenangzüktep agiba nung teinyaktsü ka latetogo aser tatembang tenangzükbaji kanga junga olemteper ang agitsü.