Manushi Chhillar-i Miss World 2017 korang angu

New Delhi, November 18 (Agencies): Miss India Manushi Chhillar-i November 18 nü Miss World 2017 takok korang nguogo. India-i küm 17 tashi iba korang ataa aruba sülen ngutetogo.
China nung aliba Sanya City Arena nung taonung tetoktepba nung linük balala nungi tetsür 108 liasü aser parnok rongnungi Manushi-i takok korangji angu.
Miss World 2016 takok angur Puerto Rico nungi Stephanie Del Valle-i Manushi nem korang semoktsü. Manushi ya Haryana nungi lir aser lai June 25, 2017 nü Femina Miss India 2017 takok korang ngua liasü.
Miss World 2017 tetoktepba nung tematiba jenjang punguji India, England, France, Kenya aser Mexico nungi tetoktepertemi nguteta liasü. Taküm tetoktepba nung Miss England Stephanie Hill-i tanabuba jenjang aser Miss Mexico Andrea Meza-i tasembuba jenjang takoktem angu.
Manushi Chhillar’er tsüraburtem ya doctor tem lir aser la St Thomas School, New Delhi aser Bhagat Phool Singh Government Medical College for Women, Sonepat nung azüng.