Mapang talangka amenbaji kechiba majung?

August 17, 2015: Mapang talanglang mena dang alibaji majung ta asenok ajaki meteta lir, ajisüaka asenok timba ka pei office nung computer screen nung rangloker mapang talanglang amener.
Talanglang amenbaji temang asoshi majung aser yamaji amenba ajanga timtem agütsübaji exercise agia kecha teyari magütsütsü, ta bushisüngdangertemi ashi.
Iba ama tali amenba ajanga temang tuozük taretba akümer aser temang nung temo tali kümdaktsür.
Anogo nung ghonda trok amenertem dak temulungjang tashidak, cancer aser diabetes melamela adoktsü tebilemtsü tulu lir ta bushisüngdang aika ajanga putetogo.
Mapang talanglang amenba ajanga tekoloki oxygen aser azü junga modaktsür aser ibaji ajanga asen shisatsü nung tashi mait küma tekolok nung timtem agütsür.
Mapang talanglang amentsüsa asüdang asenoki metettsü kar:
Mapang talangka amentsüsa süra indang indanga amentsüla. Asen anisüngzük apir kiraka amenba ajanga teperem o tapo nung aliba tetsülung raksatsür.
Computer nung mapa inyakdang kanga chiloka oa mereprangtsüla kechiba süra iba jagi tekong kanga anidaktsür aser tesülen timtem agütsütsü.
Mapang apir office takdang nung minute ishishi nokdaker jajazütsüla. Yamaji asüba ajanga temang nung azü jajaba jungdaktsür aser ibaji ajanga tekolok o tetsülung mapa tajungba inyaktsü.
TV aser computer jakdang mapang talanglang mamentsü merangtsüla.
Office nung escalator/lift dang nungibo takok tashi jenjang (steps) amshitsü merangtsüla aser phone nung jembidang nokdaker jaja-a jembitsüla.