Mayawati-i Rohingya nunger yaritsü ayongzük

Lucknow, September 13 (Agencies): BSP tanishila Mayawati-i Centre dang Rohingya nunger kibong meyirjang aikati India nung jenoktsü asüngdangba asoshi aria bilema mapa inyaktsüla ta shiogo.
Rohingya Muslim tem indang khurettem koktettsü atema Centre-i Myanmar aser Bangladesh sorkartem den olemteptsüla, ta laisa ashi.
“Myanmar arrtsülen aliba state nung mepetmesü ajanga Rohingya Muslim nunger lakh aika Bangladesh aser India kübok state kar nung jenoka lir. Iba tebilemtsü atema Modi’er sorkar osang tejangja memetetdaktsür, aser iba jagi terata ka nung lir” ta Bodbarnü Mayawati-i sangdong ka nung metetdaktsü.
“India nunger sobaliba tajung benshia aruba ama, India sorkari iba tebilemtsü ta meimchir tangatetba nung ajemdaker agitsüla. Centre-i Myanmar aser Bangladesh sorkartem den olemtepa Rohingya Muslim nungertem yaritsüla. Ibaji asü nungdang Rohingya Muslim tem parnok aliba linük toktsür marutsü” ta BSP tanishilaisa shisem.
Rohingya nunger 40,000 shi India nung jenoka lir aser parnok rongnungi 16,000 shi refugee documentation nguogo, ta UN osang ka ajanga metetdaktsü.
September 5, 2017 nü Minister of State for Home Affairs Kiren Rijiju-ibo Rohingya nungerji ozüng alema arurtem lir anungji parnok meindoktsüla ta shiogo.