Mazüoktetba sepai

Yakonung Honibar aonung Railway bazaar, Dimapur nung Nagaland Police (IRB) kati autorickshaw nung mener ooya aliba nisung ka khasetba den autorickshaw anisang yirutsüba mapaji taoksatsüka aser shisabolutsüka lir. Iba police-sangji kechikomaka tia ka nung mesüra kechika bilemer yamaji mashimashi injang yokar memetet, ajisüaka kangasa mekümdangi inyakogo ta angatetter. Aji oda, police ka tera mekümdangba ajanga mesüra mazüoktetba ajanga tai maket nisung taküm ka samatsübaji tesasatsü tuluka lir. Aibelensangjibo pa mapa dak alang temerenshi angutsüa akok saka takümjibo tanaben bener marutettsü. Sepaitem ya ozüng raksartem azüoktsü asoshi tentetba telok ka lir, anungji parnokji ozüng amshirtem. Aji oda, alima nung alirtemi ozüng shitak amshitsübaji ozüng amshir sepaitem dakji tuluka keta lir. Item ozüng amshirtem jagi nisung tepseter, ashir auer, rakzükratemer, machimajemtsü chiajemer mashimashi senzürtem, gari mashi anishirtem aser ozüng anema inyakertem ajak azüoka inyaktsü. Ibaji mapa tasak aser lendonga keta lir. Item ajakji nübortem tetsübu makai sadoksadoka lidaktsütsü asoshi sepaitemi pei taküma dena bendanga agüja inyakba mapatem lir. Ibayongji, nübortemi sepai tulutiba nungi tilabatiba tashi akümtsübur. Aji oda, tawa tanü Dimapur nung policetemi ozüng raksartem apuba aser yimti nung gari senzüsenpongba mapatem tipdema ketdangsütetba ngua nübortem pelaa alidang, tang ajungbena police kati tapi agi autorickshaw nung mener ooya alirtem dak akhaba osang jagi police-tem inyakyim aser yimyayimko indang nübortemi khen bilemdangtsüsa kümogo. Tanü asüng police-tem dak jetperaa kanga keter aser wainshin meteta jembishinüba aser inyaksangshiba angudang kanga pelar aser nümadangteta bilemer. Ano talisa police tetsürtem sepai süoshi jungjunga sübor prangpong bener yimti mita senzüa angudang aser police point nung garitem azüoka angudang Naga nungertema tangar menepa inogo ta bilema pelaa aiter. Aji oda, Nagatsürtem sepai süoshi agir yimti mita senzübaji Israeltsür sepaitemang mesük. Isarel lima nungbo tebur sepaitem tongpang nung nokdaker aser tetsür sepaitemi par lima  süngküm anüker aser yimti miter. Parnok amaji kasa Nagatsürtema kanga aküm taket aser jetperaa metetba sepaitem lir. Ajisüaka, khenkhen Nagaland police-tem ya yimti mita senzüba mapang sepaitem mita senzür memesük kima yimdong nung public kazüa senzür ama telong ka dener jajaba angur. Ano, khenkhenbo police süoshi agir button-a junga matang yi agi meseper ajurur, ano khenkhenbo police-temang  autorickshaw tejaklen auto anishisang den külemi joketa mener ooya aliba angur. Item noksatem jagi police-tem dang masü saka asen lima nüngku bentetter. Ano, yakonung Railway bazzar nung atalokba sülen nübortemi police indang jembidang, tanü asüngbo Nagaland police-tema tsümalen police amato sen sen dang bushia jajar ta nübortemi jembiba angashir. Item ama jembiba o ji shitak asütsüa mesüra tiyazü asütsüa akok, saka policetemi süngküm nung garitem dang sen meshir, khu abenba gari soter sen meshir, yimti nung sen asayartem dang sen tera meshirbo odang asayadaktsür, shishilembartem dang sen meshir, tamalenbo policetemi senbosa memeshi saka tanü asüngbo mejimenu ajak nung sen dang meshir ta yimti nung nübortemi police nüngsen jembiba agi süngadokogo. Iba jagi police-tem aküm alur aser mera maket kümdaktsür. Asen lima aser loktiliba asoshi kanga tia maka kaji aji asütsü. Kodang nübortemi police aküm metsübulir aser police dak temulung melemtetdir, aji alima tatem amai ka asütsü. Anungji, nübortemi peisasa pei  sepai bushia ayutsüsa akümtsü. Alima nung lendongji yang nung jagi tenzüker. Ibaji angateta tanü asen lima nung police-tem mapa nung asentenshi adoktsü kanga nüngdaka kümogo. Yimten lenirtem majungtsüa akok saka mitkartem jungra nübortembo tipdema litettsü.