MEA-i Irma yipru agi kongshirtem atema inyakdar

New Delhi, September 09 (Agencies): Honibarnü External Affairs Ministry (EAM)-i sangdong ka ajanga, US, Venezuela, France aser Netherlands linüktem nung yipru tesashi ‘Hurricane Irma’ dak sendakba nung item linüktem nung aliba India nunger den tongtepratepa inyakdar, ta metetdaktsü.
Ministry otongdar, Raveesh Kumar-i, item linük pezü nung aliba India nunger nem teyari agütsütsü atema Indian missions-i item sorkar ketdangsertem denji tongtepa jembidar, ta metetdaktsü.
“Irma yipru ajanga kongshiba sülen Venezuela, Netherlands, France aser US nung aliba asen Indian mission-i iba tensa repranga inyakdar. Parnokisa Irma yipru ajanga kongshiba India nunger aser sorkar ketdangsertem denji den tongtepratepa inyakdar,” ta Kumar-i twitter ajanga ashi.
Irma yipruji ghonda ka nung kilometer 260 tekara nung Cuba’s Camaguey Archipelago ali atongba sülen Florida tsütsüleni ao aser iba yipru ajanga nisung 19 tepsetba den Carribean islands nung ki meyirjang aika raksatsüogo.
External Affairs Ministry otongdarisa twitter ajanga bendanglen alir India nunger nem helpline numbers agütsü: Embassy of India, Venezuela (+58 4241951854/4142214721); Netherlands (+31247247247); France (0800000971).