Meghalaya nung sen 5,000 cheque alem; BJP-i aitsür

Guwahati, Aenjeti (January) 12 (Agencies): Meghalaya nung Congress MLA tem aliba assembly constituency aika nung nisungtemi sen 5,000 indang cheque ngua kanga süngmangtep.
Taruba ita Meghalaya nung assembly elections agitsü sentong lir aser iba mapang sen agütsüba atema opposition-i Mukul Sangma-i aniba sorkar aitsür.
East Khasi Hills district nung aliba Mylliem, Mawphlang aser Sohiong constituency tem nung tia taka vote agütsürtem dangi cheque aru. Parnok teimbaka tetsürtem dang liasü aser cheque anguba sülen Upper Shillong nung aliba Bank of Baroda-i parnok ao. Cheque nungji local block development officer (BDO) temi sign süa liasü.
“Bank nung cheque anguba tetsürtem tarensena noktaktepa angudang ni kanga aoksa. Parnok karibo kechi komaser cheque ji angu’ar memetet liasü” ta Civil Society Women’s Organization (CSWO) tir Agnes Kharshiing-i osangbener dang ashi.
Taruba assembly election nung Congress aser Bharatiya Janata Party tsüngda kanga tokteptsü ama imlar. Khristantem teimba sür aliba state nung BJP-i sorkar akümtsü meranger.
Taruba anogo ishika tsüngda Election Commission of India-i Meghalaya, Tripura aser Nagaland nung election agitsü anogotem indang osang metetdaktsütsü akok.
“Iba ya tim masü. Taoba küm 5 tsüngda Congress-i Meghalaya atema kecha meinyaktsü. Tang parnoki sen agi vote agütsürtem mesüzüktsü meranger, ajisüaka nisungtemji suwar masü” ta Meghalaya BJP tir Shibun Lyngdoh-i ashi.
Ajisüaka, Congress-ibo tim mesüi inyakba kecha mali ta metetdaktsüogo. Tang teinyakdak women’s empowerment scheme tem nung shilem ka ama cheque tem lema agütsü ta parnoki ashi.
“Kümshia iba ama cheque tem lema agütsür. Kü constituency nung women economic empowerment scheme kübok tetsür 2,000 nem sen lema agütsüogo” ta Mawphlang nungi Congress MLA, Keneddy Cornelius Khriem-i ashi.
Senji tangutsüpur nem inyakyim nung aliba ama agütsüogo aser election agitsü anogo ano memetetdaktsü lirji tim mesüi inyakba kecha mali ta East Khasi Hills district deputy commissioner PS Dkhar-ia metetdaktsü.
“Tangutsüpurtemji voter ID card alitsüla ta telatetba liasü. Kibong kar nungbo nisung asem nungi pezü tashi cheque angu. Onoki iba onük atema RTI tasüngdangba ka agütsütsü” ta CSWO tir Kharsiing-i ashi.