Mejangjaba tanelatem

“Temeimbatem, nenoki tanela ajak dak tamang, saka tanelatem Tsüngrem nungi asü masü parnok tendangang; kechiaser tiyazü ainkar jenti alima nung adokogo” (1 Yn. 4:1).
Asentenshiba mapang arogo otsü nung memetetba mi jenti ajangshia aruogo. Mezüng tenyartemi iba mi asoshi tekümdangtsü shia aru. Kümdanga alitsü ashiba tetezü renema alitsü ashiba lir. Iba kuli nung ajemdaker parnoki sayutsüngi masüba tangar Yisu, tangar osangtajung aser tangar tanela Tsüngrem anema sayutsüngiba anema tekümdangtsü ashi (2 Kor. 11:4).
Tsüngrem tenzükertem dang nungi tiyazü tenzüker aser tiyazü tesayur timba liasü. Iba indang aika nung amshiba angur. 1 Yn. 2:18; 41; Mt. 7:15, 22, 25:5; 2 Kor. 2:17; Fil. 3:18. Au, tsükchirtemji tzümetsüng ama arur (Isa. 59:19). Tiyazü tenzükba mapa melen Yisui, “tsünglu” “tzümetsüng” aser “mopung” ta jembi (Mt. 7:15, 25). Pauli tiyazü tesayuba mopung agi minzütsü ta jembi (Ef. 4:14). Tanelatemi Tasen Lai arogo nung mashi tenzüker kar ajanga tenzüktsü akok (Ef. 4:11). 2 Korint 11:13 nung asenoki tiyazü tenyartem indang azünger. Tiyazü ainkartem (Mt. 7:15), tiyazü sayutsüngirtem (Gal. 1:6-8), tiyazü sannükertem (Yn. 10:12) aser tiyazü tesayurtem (2 Peter 2:1). Tatem anogo tonga arudang, tiyazü tanelatemi mapa tali inyaktsü. Iba indang Tanela Temeshi ajanga shin (1 Tim. 4:1). Mekümdangba tamangertem tamang nung pilatsü. Ibai ajungben pilaba masü saka mera ka sülen mera ka apunger aotsü.
Tenyartem ajaki tanela balala agi inyakba sayutsüngirtem anema kümdangdaktsür. Item indang Pauli amshiba otemji reprangang. Tekülak inyakertem (2 Kor. 11:13), timtemdaktsür (Gal. 1:7), tiyazü adianutem (Gal. 2:4), mashileni odaktsür (Gal. 3:1), azütem, tamajung inyakertem (Fil. 3:2), kangki tsükchirtem (Fil. 3:18), tekelakokdaktsür, amajok mapa (Kol. 2:4,8), mezümekümer (Kol. 2:8), anemsü (2 Tim. 2:16), asüküm nisung (2 Tim. 6:4), teraksa (2 Tim. 6:5), mojing sang nung apurtem (2 Tim. 2:26), temeyipoktsürtem (2 Tim. 3:13), amajok O jembirtem (Tit. 1:10), tim masüba sayurtem (Tit. 1:11), telemsateper (Tit. 3:10).
Tanü tesayuba balala aika Arogo nung adoker. Tanü Arogo, Khrista Temang asoshi tongtipangtiba sempetji, “Tangatetba Tanela” nüngdaker. Item indang asenoki anogo pezü pungu ka reprangtsü.
Sempet tajung aika agütsüsang Kotak Obala, tanela tajung, tamajung angatettsü sempet kü nem kua. Amen.