Mel Gibson-i teka sangshiba police-i bushisüngdanger

August 25, 2015: Deobar nü Mel Gibson noksa tangoker tetsür ka den mangatettep adoka raratepa pai teka sangshiba jangjatsü atema Australia police-i cctv nung tangoka aliba noksatem bushisüngdangdar aser tetong danga asüngdangya asütsü sentong lir.

Lethal Weapon film nung tongti shilem agisang, Mel Gibson aser tetong Rosalind Ross na Sydney nung film reprengba tesem ka nungi aludang noksa tangoker, Kristi Miller-i pa noksa tangokba ajanga la dak teka sangshiogo ta Gibson aija lir.

Ajisüaka Gibson atema inyaker kati tekabo mesangshi ta shiogo saka police-i iba tatalokba nung bushisüngdangtsü tenzükogo aser tetong Ross ji küli ka ama amshitsü parnok tebilemba lir.

Surry Hills Police nung Superintendent, Tony Crandell-i, “Iba tatalokba nung bushisüngdang tenzükogo aser mapang kar nungbo onoki Wb Gibson tetong danga asüngdangyatsü kechiba süra ibai atalokdang la dena liasü,” ta Sydney Daily Telegraph dang ashi.

Tony Crandell-i ashiba agi, parnok department-i security camera nung aliba noksa agizükogo aser tenük küli angurtem dang nungi küli bendentsü.

“Mel Gibson ya film nung tongti shilem agir aser movie director ka lir. Pa ya nüburtem ajaki kanga sapuba tongtibang nisung ka lir. Ajisüaka onok den inyaker noksa tangokla yabo la mapa inyakerba dang lir. Pa film actor ka asüyonga mashi nisung ka luja teka sangshitsü temeden mali,” ta Sydney Daily Telegraph nung yim o zülur, Paul Whitaker-i pa den inyakla pusema shiogo.

“Iba tatalokba nung onoki Kristi takok tashi nungittsü aser police-i kechi nüngdaker ajak nung yariteptsü. Kristi ya kanga dang yimya tajung aketba tetsür ka lir anungji lai la tajungtiba inyakogo ta anoki amanger,” ta paisa ashi.