Menuosetuo-i 59buba NASA Wrestling Meet aben

Kohima, Tsüklai 2 (TYO): Khouciezie (Local Ground) nung 59buba Northern Angami Sports Association (NASA) Wrestling Meet nung Kohima village-i temaba jenjang pezü nguteta Menuosetuo Yiese-i takok ngutetogo.
Arishi küm 19 tain melangteper Menuosetuo ya asür Khrielatuo Yiese’er jabaso lir. Pa tar feet 6 aser temang tuozük seret 114 lir. Final asaya nung pai Kekhriengulie Whuorie madak takok ngutet.
Iba asayamung semi-final nung Menuosetuo-i tawa Kohima Village Sports Association asayamung nung takok angusang, Kezhaseluo-o Pienyü madak ayong ayonga takok ngua liasü aser pa (Kezhaseluo-o) tasembuba jenjang ngutet.
Kasa asayamung nung pezübuba jenjang ya Menuosetuo teti, Seyiekhrietuo Yiese-i ngutet.
Iba asaya nung takok angurtem nem agütsüba senpet sen ya champion nem sen 80,000, 1st runners-up nem sen 50,000, 2nd runners-up nem sen 30,000 aser 3rd runners-up nem sen 20,000 agütsü.
Rogonü iba asayamung nung Nagaland Football Association tir aser State Chief Commissioner, Bharat Scouts & Guides, Atuo Mezhür tutoshi tejaoker liasü aser pai takok angurtem nem senpet agütsü. Iba asayamung ya Küptoknü National Free Style asaya tembangtsü aser iba sentong ya Nagaland Contractors’ & Suppliers Union, nung tir Pelesielie Khezhie-i tongti tesemdanger ka ama lapoktsü.