Metsüremi 13, 2018 tashi nung NPF-i sorkar akumtsü: TR Zeliang

Tuensang/Noklak, Tsüklai (February) 15 (TYO): Yangtepnü (Brihostibar) Nagaland Chief Minister aser NPF Chief Minister candidate, TR Zeliang-i, North-East India nung regional party tejentiba aser talangtiba aliba party ji Naga People’s Front (NPF) lir, aser 1963 küm iba party tenzükba mapang nungi Naga nunger len ania arudar, aser taruba ita Metsüremi (March) 13 tashi nungbosa NPF-i sorkar akumtsü, ta shiogo, ta tanü Press Bureau, NPF, Central Headquarters Kohima, Nagaland sangdong ka ajanga metetdaktsü.
Tuensang jila nung NPF Tuensang Division atema nüboyim tenzüktsüdang Chief Minister-i party tenzükba mapang nungi parnoki inyaka arubatem, talisa 1998 küm Assembly election nung NPF Party-i Naga nunger ola angaa iba election nung shilem magiba indang metetdaktsü.
Iba dak sendakba nung pai, “Taoba mapangtem nung NPF Party-i Naga nunger aniogo, tanü-a Naga nunger anidar aser maneni tarutsü nunga Naga nunger anitsü,” ta metetdaktsü.
‘Alima noksa temaitsü’ aser ‘Nationalist tenüng’ keta aliba NDPP Party ya ‘un-recognized yim’ ka dang mesük, ta shia CM-i, tang tasen tentetba NDPP Party yagi Nagaland aser Naga nunger atema kangabo bilemja mali, ta ashi.
BJP aser NDPP na tsüngda menden 20:40 lemsaba dak sendakba nung T. R Zeliang-i, Nagaland nungbo menden lemsabaji mapa küma meinyakteter, ta ashi.
Ano state nung tang tasen tentetba district, Noklak nung nüboyim tenzükba sentong nung T.R Zeliang-i terenlok mapa balala metetdaktsü, talisa district nung tang teyangludak gari lenmang indang metetdaktsü.
“Tanga yimtenren party tem ama masü saka onokibo tarutsü nung inyaktsü atema masü saka tang teinyakdak mapatem indang metetdaktsür,” ta paisa ashi.
NPF Party nung timtem agütsürtemi NDPP tentetogo, ta shia pai, tangbo parnokji medeni state asentenshitsü aser tashi itshia Naga nunger nüma tanga litettsü, ta ashi.
State nung sensotem dang pei senti vote ji NPF Party nem agüjang ta shia, T.R Zeliang-i, NPF-i aniba sorkarji Naga nunger timtibai aginüba ama tentettsü, ta metetdaktsü.