Miss Dimapur 2016 November 5 nü shimtsü

Noksa abelen Miss Photogenic , Zhimoholi S. Zhimomi aser achiji Miss Dimapur 2016 final nung shilem agitsüpur  angur.

Dimapur, November 03 (TYO) : Miss Dimapur 2016 sentong November 5, 2016 nikongdang 3:00 ako nungi Hotel Saramati nung akatsü. Taküm iba tetoktepba nung tetsür teneti shilem agitsü. Miss. Dimapur 2016 nung shilem agitsüpur aika rongnung parnok tenet ya final nung tokteptsü atema Ethnic Group of Nagaland (EGoN)-i kanga junga asadanga tendanger shimtetbatem lir.
Parnok tenet den November 2 aser 3 anogotem nung official photo-shoot, grooming session, fitness aser parnok nisung shia den mongintem aser taküm tetoktepba nung tetendangertemi sensaksem agiogo.
November 2, 2016 nü Hotel Saramati nung EGoN-i Miss Dimapur 2016 atema official photo-shoot sentong ayonga kaogo aser iba tetoktepba nung Contestant No.1, Zhimoholi S. Zhimomi Miss. Photogenic adok. Iba tetoktepba nung adenertem nem o anükalema jembitsü, tangar den yimyayimpong koma alitsü, beauty & makeup aser catwalk nung tesayuba agütsü.
November 03, 2016 nü final nung shilem agitsü shimteta aliba aiür tenet prong taküm final sentong nung parnok tendangtsü purtem den sensak asemtsü maongka agütsü. Iba mapang tetendangertemi parnok nisung shia den jirola sensaksem mapang agia liasü. Sensaksemba mapang tetendangertemi tetsürtem yimyayimpong, anükalem, jembishinü, tobur ajung aser merendaki jembishinüa tasüngdangbatem langzükbatem nung tendanga liasü.
Miss. Dimapur 2016 nung tetendangertemji Sentinaro Jamir (BSN), Dr. Hewasa Lorin (Director- Student services, Tetso College), Moala Yaden (homemaker), Zhokhoi Chuzhu (Bollywood actor aser Martial arts mongin) aser Bubu Patrick (District Project Associate, Nagaland State Disaster Management Authority) nunger lir.
Iba den külemi kuo aser makeup atema official sponsor Queen’s Parlour, City Tower aser official photographer ji Akato A. Rochill nunger lir.