Modi-i kechiba pa indang Principal Secy., CJI dangi yok ?: Congf

New Delhi, Aenjeti (January) 13 (Agencies): Yashi New Delhi nung Supreme Court nung judge -pezüi osangbenertem senden ka ayongzüka jembiba sülen tanü Honibarnü Congress-i Ato kilonser, Narendra Modi dang, kechiba nai nü indang Principal Secretary, Nripendra Misra Chief Justice of India (CJI), Dipak Misra`er kidangi yok, ta asüngdang.
Tanü Ato kilonser, Modi indang Principal Secretary, Nripendra Misra Justice Misra`er kima angu.
Congress otongdar, Randeep Singh Surjewala-i twitter ajanga, “Ato kilonser indang Principal Secretary, Nripendra Misra-i 5, Krishna Menon Marg nung aliba CJI’er ki semdang; Ato kilonseri pa indang osangbener Chief Justice of India dangi yokba atema pai telangzüba agütsütsüla,” ta metetdaktsü.
CJI Misra-i yimtenren lenirtem dak sendakba ken otem teshimtet judge kar nem dang lemzüktsüba nung ajemdaker yashi Justice J. Chelameswar densema senior Supreme Court judge pezüi Justice Misra aija liasü.
Supreme Court judge pezü jagi, Chief Justice of India-i tim benches nem ken o lemzüktsüba nung temzüng/inyakyim nung aliba ama meinyaker, anungji linük democracy amokmeren tia ka nung lir, ta linük nüburtem dang sangdonga liasü.
Justice Chelameswar den tanüngba judge asemji -Justices Ranjan Gogoi, Kurian Joseph aser Madan B. Lokur nunger liasü.