Modi-Shah aser Siddaramaiah tsüngda tashi tokteper

Amungnü Prime Minister Narendra Modi-i Karnataka nung election nüboyimba tenzüktsüogo aser iba mapang pai Congress-i kümteta aliba Karnataka state sorkar dang ’10 percent government’ ta jaloktsü aser ochimashi agi sünga aliba sorkar ta aitsüogo. Karnataka assembly election ya taküm Rongchii/Monupii itatem nung agitsü sentong lir aser assembly election tulutem rongnung iba ya ka asütsü. Gujurat assembly nung Congress-i takok tajungba anguba aser ano India Today Mood of The Nation poll nung Rahul Gandhi nem jenjang tajung agütsüba nung ajemdaker Congress-i Karnataka nung takok tajung angutsü imlar, saka külen Centre nung sorkar kümteta aliba BJP-ia Karnataka nung taruba sorkar akümtsü atema kanga meranga inyaker. Gujurat aser Karnataka state tem nungi Parliament nung MP aika yoker aser tang Congress MP 10 dak tema aliba state anaji Gujurat aser Karnataka na lir. Anungji Congress-i iba state nung tamakok ngura taküm küm tatemlen Madhya Pradesh, Rajasthan aser Chhattisgarh state tem nung assembly elections agidang tetsükdaktsü ajurutsü, kechiyong item assembly election ji 2019 Lok Sabha elections indang semi-finals ama züngshir. Kasa tangatetba nung BJP-ia Karnataka nung taruba sorkar akümtsü atema meranger aser Prime MInister Modi o BJP tir Amit Shah nati sentong atonga mapa inyaka arur. 1985 küm Ramakrishna Hegde-i Karnataka nung tanaben chief minister inyaktsü tashi anguba dak alaka iba state nung chief minister shingaia kümsük anaben inyaktsü takok mengudangi arur aser ano iba state nung nübortemi sorkar tanaben kümsük inyaktsü maongka magütsübaji yimya ka ama lir. Tang teinyakdak chief minister Siddaramaiah-i BJP anema kanga meranga tokteper aser iba atema BJP atema asalentong yanglurtem dena süngmangdaktsür. BJP-i tanga state tem nung inyakba ajizüka Siddaramaiah-ia mapa inyaker aser paisa BJP tir Amit Shah nungi angazüka inyaksangshir. Amungnü Modi-i Bengaluru nung arua anenzükdang Siddaramaiah-i mezüng Twitter ajanga Modi pelaa agizük aser idangji par sorkari mapa inyaktetbatem kar metetdaktsü. Yimya agi iba mapaji BJP lennirtem aser party-i inyaker saka Karnataka chief minister-i tweet asüba jagi ajak ajembang. Siddaramaiah-isa Modi-i o jembitsü aliba atema onük ka bendenloktsü aser ibaji ashishitep aketba Mahadayi ken o atema pai Modi dang pa indang tebilemba shiang ta akhangba liasü. Siddaramaiah-i iba mapa ya tang mezüng inyakerba masü saka taoba ita BJP tir Amit Shah-i Mysuru semdangdanga Goa den tzü lemsatepba mangatettep atema aluyimertemi ayongba sentong ka Congress-i pusema nungit aser iba jagi Shah’er sentong nung nisung aika madentsüsa aküm. BJP-i Hindu vote angutsü atema Hindutava onük nung ammeter mapa inyaker saka Siddaramaiah-i ibaji anema Kannada akhüm nung ajemdaker mapa inyaker. Siddaramaiah-i state atema wako balaka, oshi wazüka ayutsü, Hindi signboard aser Mahadayi tzü lemsaba tebilemba onüktem nung ajemdaker mapa inyaker. Paisa school ajak nung (ICSE aser CBSE dena) Kannada ya compulsory subject ka kümdaktsü aser Kannada oshi agi mozü kitem indang card menüng. Siddaramaiah’er sorkarisa caste census ka inyakogo saka iba osangji yimjak nung memetetdaktsür. Ibaji Centre-i caste census inyakba den kasa lir aser opposition-i takhangba agüjaka NDA sorkari iba osang yimjak nung memetetdaktsüi lir. Siddaramaiah-i Tamil Nadu nung inyakba ama teküpok jenjang nung alirtem, Dalit aser telok tilatem nem 70% reservation agütsütsü nangzükogo. Paisa par sorkari inyaktetbatem osang prokshir aser Gujarat assembly election mapang-a pai social media nung Karnataka sorkari inyakbatem prokshia liasü. Gujurat nung BJP sorkar kanga junga ketdang asür ta BJP-i jembir aser ibaji anema Siddaramaiah-i Karnataka nung Congress sorkari tajungba ketdang asür ta meyiptsür. Siddaramaiah-i yamai tekong meranga BJP den toktepba angudang taoba mapang Delhi chief minister Arvind Kejriwal aser Bihar chief minister Nitish Kumar natia BJP den toktepba bilemteter aser tena ama pai BJP anema takok ngudisü ta bilemer. Ajisüaka, 1985 sülen nungi Karnataka nung chief minister shingaia kümsük tanabuba meinyakdangi arur asünung Siddaramaiah-i iba otsü melentsü asoshi kanga meranga inyaktsüla, aji ta mesüra Modi-Shah nati pa atsüngdoker Karnataka nung BJP sorkar akümtsüba nükjidongji ataloktsü.