Mokokchung DC & DEO-i political party aser lokti tentet tem ajuru

Dimapur, Aenjeti 19 (TYO): Election Commission of India ajanga Yimpoksüi (November) 1, 2017 anogo sangdong ka ajanga Nagaland kübok assembly constituency shia Returning Officer kaka lemzüktsüba sülen candidate temi aruya aliba election atema nomination paper ya temelaba nung agütsütsü. Taoba mapangbo candidate temi pei district nung aliba DC & DEO, shiba Returning Officer liasü, pa dangi arua nomination paper ya agüja aru.
Nagaland Legislative Assembly atema aruya aliba 13buba General Election dak sendakba nung political party tem, Ao Senden, Watsü Mungdang aser AKM den Mokokchung DC indang office chamber nung senden ka Aenjeti 19, 2018 nü amendang, Mokokchung district atema Returning Officer ti (8) lemzüktsüogo, ta Mokokchung DC & DEO, Sachin Jaiswal-i ashi.
21 Tuli A/C nungi candidate temi nomination paper ya ADC, Tuli nem agütsütsü, shiba Tuli A/C atema Returning Officer shimtet, 22 Arkakong A/C nungi candidate temi nomination paper ya SDO (C), Changtongya nem agütsütsü. ADC, Mokokchung, W. Manpai ya 23 Impur aser 24 Angetyongpang Assembly Constituency atema Returning Officer alitsü. SCO (C), M. Chaitenya Prasad, IAS ya 25 Mongoya aser 26 Aonglenden Assembly Constituency atema Returning Officer shim, aser Longdiba L. Sangtam ya 27 Mokokchung Town aser 28 Koridang Assembly Constituency atema Returning Officer alitsü.
Mangkolemba SDO (C), Chonpen Ezung ya 29 Jangpetkong A/C atema Returning Officer aser Mangkolemba ADC ya 30 Alongtaki A/C atema Returning Officer alitsü.
Iba senden nung DC & DEO-i political party ajak aser Ao Senden, Watsü Mungdang aser AKM ketdangsertem dang election dak sendakba maparen aser sentongtem rasa ashi aser district nung aruya aliba election tesünep nung takok ngua agitettsü asoshi amalitep akatsü ajungshi. Pai-sa iba senden nung Model Code of Conduct amshitsüba indang metetdaktsü aser iba yimya shidak amshitsü shisem.