Naga Hoho aser ENPO nati NSCN(K) lenir ajurutsü

Kohima, Aug. 20 (TYO) : India den yimjung mapang anener aliba tensa tia ya ken reprangshir anosa yimjung nung alitsü atema mepishitsü asoshi Naga Hoho aser ENPO nati oagi Myanmar nung NSCN-K lenir ajurutsü renemtepdagi.
” Eastern Nagaland Peoples’ Organisation (ENPO) aser Naga Hoho na külem ser oagi NSCN (K) lenir ajurutsü asoshi renemdagi,” ta tanü Brehostibar nü külem sangdong ka nung Nagaland nung Naga nunger tematiba telok anati metetdaktsüogo.
ENPO tir Wb.Khoiwang Konyak aser Naga Hoho tir Wb.P.Chuba Ozukum nati ashiba agi, parnok aotsüba mapang aser anogoji yakta lemtettsü.
Kasa sangdong nung parnoki ashiba agi, Naga Hoho aser ENPO na pronglai NSCN-K lenirtem ajurua parnok o India na tsüngda yimjung raksar aliba ya ken meyipa reprangdanger ano tanaben yimjung nungsa alitsü asoshi mepishitsü temulungtetba tulu nung renema lir. India den yimjung nung liasüba tia ya malitsüsa akümbaji NSCN-K teloki parnoksasa yimjung agienba ajanga ataloka lir.
Myanmar nung oa NSCN-K lenirtem ajurutsübaji state sorkari mepishiba ama inyaker aser iba jagi Naga nungertemi aginüba ataloktsü imlar ta tenatisa metetdaktsü.
Ajisüaka, ano külen yakanü August 18 nü tobo India sorkari Myanmar sorkar dang par lima nung jenoka aliba NSCN-K lenir Wb. S S Khaplang dena agüjang ta metetdakja liasü.
Manipur nung June 4 nü NSCN teloki sepaitem amakba lendong nung nisung 18 asüba maparen nung Indiai NSCN-K lenirtem Myanmar nungi meshir.
Indiai aputsü bushiba tetsüditemji Khaplang den Niki Sumi, Kirichu aser Asang nungertem lir. Parnok yagi Manipur nung Chandel district nung NSCN purtemi sepaitem 18 khasetba maparen nung shilem tululu agia lir ta angazüker.