Naga yimtenren onük tekaraba nung latetdaktsüner: NCD

Dimapur, Aenjeti (January) 18 (TYO): Naga Tribes 19 dena aliba Naga Council Dimapur (NCD)-i Naga yimtenren tebilemtsü tekaratiba nung latettsü onük dak sendakba nung Naga Women Hoho Dimapur, DUCCF & GBs Union (Sadar) Dimapur den senden aiben mena o lemtepogo, ta tanü Naga Council Dimapur Tir, T Pangerloba aser Naga Council Dimapur tongti tezülur, Thsapongkyu Sangtam nati sangdong ka nung metetdaktsü.
“Naga yimtenren tebilemtsü onük tekaraba nung latettsü atema India sorkari aika inyakogo, talisa August 3, 2015 nü Framework Agreement atema onoki pelar, iba den külemi tang Naga National Political groups (NNPGs) working group den ken o jembiba atema pelar,” ta parnoki metetdaktsü.
“Naga nunger küm aika timtema aruogo, küm 70 dak tema raraba aser küm aika ceasefire yangluba den ken o jembia aruogo; Naga yimtenren onük tatembang telemtetba ka dangi arutsü merangaka onoki ibaji menguteter,” NCD-i sangdong nung shia lir.
“Iba ama timtem ajanga Naga nunger lanur aika jenjang raksaogo aser parnok tarutsü jenjang raksatsüogo. Anungji Naga nunger ajaki agizüktettsüsa tatembang telemtetba ka atadang, tesem nung tesünep alitsüla, koba ajanga taküm ka renloka littettsü aser tanga linüktem den liromedema litettsü,” ta NCD sangdong nungsa shia lir.
“Lokti tentet balala, Arogo, tribal hohos aser yimtenren party tem densema Naga nunger ola aser taginübaji, tekaratiba nung Naga yimtenren ken o latetner aser tesünep aginer. Anungji India sorkar dang Naga nunger taginüba akhümtsübua Naga yimtenren onük tekaratiba nung latettsü onoki mepishir,” ta NCD-isa kasa sangdong ajanga metetdaktsü.