Nagaland aser Assam Angh miim tebilemba temai adok asü?

~ Lima Jamir,  Senior Citizen, Dimapur.

Mapang ka nisung shingaia memeteti aliba PB Acharya Angh menden atema shimdang, pa den anasatepa aliba nisungtema kanga aoksa, aser tang pa aibelena inyaksangshiba ajanga North East Region nung kanga nüngtugu kümogo.

Olulu kar angashiba agi North East Region nung pa küm 40 tema RSS ‘missionary’ inyaka aru, aser tang jungkai adokbatem ajanga iba oluluji shitak ta kuli agütsüogo.

Nagaland Angh PB Acharya-i March 26, 2015 nü Mayapur Temple nung o jembiba ajanga iba linük tamendakdak ‘Secularism’ atema maaksü bener arutsüogo.

Külen pai North East Region atema süoki ia bilemtsür ta sayur saka ano külenbo pai Northeast purtem tiyazü nung aija pa tejashiba yimjak nung sayur. “Northeast state kar nungbo nisungtemi Krishna tenüng amshiba atema temerenshi angur. State kar nungbo Krishna tenüng metetshiteter. Asen linük nung iba tenüng mamshiteter. Nai ‘Hare Krishna Hare Krishna’ ta shira, na merenshitsü. Ibala tesemji North East nung lir” ta Acharya-i jembi. Süra iba ya ‘freedom of speech’ ta ser dang yutsütsü asü ? Khenyongi masü! Iba ya tesempatep adokdaktsütsü atema pei nem lemzükja aliba tashi angbangyima amshiba inyakyim ka lir.

Angh-i indangindanga pai koba State indang jembir ar ashitsü asü ?

Paisa ashiba agi, “Nenok ajak (Hindu tekülemertem) North East-i arung aser tenla ki, school, orphanage aser mozü kitem ajanga tsüngrem osang sangdongang.”

Iba ya ajanga Angh-i pai miima alizüng ayubatem tongtettsü atema tangalen nungi doctor tem anir arur. Iba mapa ya public atema süoki ia bilemja inyakba ama sayur aser ibaji ajanga pa ‘nübortem asoshi Angh’ ta jenjang yanglutsü meranger. Iba ya mezüng tachitsü tanang agüja chidaktsür tatem nung tesülen tashi agi maoktsüba ama lir. Hau onok school tajung nüngdaker, nüngdakbapurtem atema health care, orphanage tajung nüngdaker, saka Angh, kü dang tai tokang, ozü lima nung Mandir movement tashiyim agi meinyakdaktsütsü.

Nagaland state nung Hindu, Muslim, Sikh, Buddhist aser tanga tamangba yimsü aika lir aser na ozü limai marudang nungi onok ajak tanela nung ka ama dang liyonga arur. Nagaland nung tanga yimsü amanger Naga nunger masüba telok ajaki asangsang osangji yimjak nung metetdakjang.

“Khristan tem yangi arur aser Khristan yimsü dangi meyipdaktsür, saka asenoki Mandir peria meyanglur. Mandir tem yangluba dang masü asenoki itemji nüngtugu kümdaktsütsüla. Iba ya tekaratiba nung inyaktsüla, kechiyong mapangi asenoki matasü aser ongdang malitsü” ta Angh Acharya-isa ashi. Iba ocet azüngertemi pei tangatetba yari telemtetba agitsü, saka ni Acharya dang tasüngdangba ka asüngdangner. Peisasa mulungteta amanger Khristantem nai kechiba magizüker aser kechiba anema noktaker?

Naga Hoho den külemi, nia tasüngdangba kar asüngdanger :

1. Ibala mesükba onük jembiba ya Secularism anema masü nah ?
2. Ibala onük ajanga North East tesem adena orr azünger ozü chirnurtem tanga tamangba yimsü amangertem ket nung lendongbang nung yutsür masü nah ?
3. Nai ‘ache din’ rasa jembibaji Krishna tesayuba agizükertem asoshi dang asü ?
4. Tamangba yimsü nung ajemdaker nai North East Region nung telemsa tali adokdaktsütsü bilemer asü ?

Tatem nung: Nai “India Linük Temzüng kümzüktsü, wazüka ayutsü aser lendong nungi noktanga ayutsü,” ta tenangzükba agir süra, kechiba tang nai iba tenangzükba anema inyaker ?