Nagaland nung higher education ajungkettsü atema inyaker: Deo Nukhu

Kohima, August 18 (TYO) : State sorkari Nagaland nung higher education jenjang ajungkettsü atema takokba tashi inyakdar ta Higher & Technical Education Parliamentary secretary, Deo Nukhu-i tanü metetdaktsü.
Tangutsü lenmangtem dak ajemdaker college tem nung subject talila benoktsü aser jenjang ajungkettsü, ta Deo Nukhu-isa ashi.
“Onoki iba college (Kohima College) nung subject talila enoksemnür” ta Mongulbarnep Kohima College nung 49 buba Annual Freshers’ Day sentong nung pai ashi.
Deo Nukhu-isa 2017 nung Kohima College Hon Jubilee amungtsü atema pelaba metetdaktsü aser küm ana tsüngda NAC nungi Peer Team kati iba college semdangtsü, ta ashi.
Parliamentary secretary-isa ashiba agi, sangküm tashi nung Dimapur Government College nung science stream tenzüktsü sentong lir aser sangküm nungi Kohima Science College, Jotsoma (Autonomous College) nung M.Sc. course tenzüktsü.
NAAC assessment ajanga Fazl Ali College Mokokchung-i Grade A angutsü imlar aser ibaji anguba sülen autonomous college akümtsü temsüa akümtsü, ta Nukhu-isa shisem.
Kobi melii Nagaland nung medical college aser engineering college ka lapoktsü atema sorkari mapa inyakdar aser iba sülen Agricultural University aser Veterinary College lapoktsü tebilemba lir, pai metetdaktsü.
“Angazükba ya kodanga manenba inyakyim ka lir anungji kaketshirtemi mapang shia kaketnang semdangtsü yimya sübatsüla aser shisatsü talila angazüktsüla. Ano kaketshirtemi subject shimdang kanga junga shisadanger ang shimtsüla aser idakji rangloker meranga azüngtsüla. Iba jagi kija atema dang masü saka college aser lokti atema tenüng tajung bener arutsütsü,” ta Deo Nukhu-isa ayongzük.
Sentong nung Kohima College principal, Dr. Watijongshi Jamir-i o jembidang, college nung tang tezüngdak kaketshir 1400 jungnüa lir ta ashi.
Pai kaketshirtem dang hadir pezü – züluba, azüngba, jembiba aser bilemba amettsw ayongzük.
Tanü agiba sentong nung mendenji Jevika Awomi liasü, Kohima College vice principal Zetso Sakhrie-i telok pela agizük aser Freshers’ tenüng nung Tsalila o Veyito nati o jembi.
Vimeyiekho Vitso aser Danolii na Mr. aser Miss Kohima College 2015-16 shim.