Nagaland nung yimjung atema sarasadem

Kohima, November 18 (TYO): Nagaland Baptist Churches Council (NBCC) züngsemtem den külemi tanü Nagaland MLA temi State Banquet Hall nung Prayer Day amung.
Tsüngrem dang nungi lennirtem asoshi shisatsü meshia aser Nagaland state nung yimjung atema tanü sarasadem sentongji ayongzüka agi.
Sentongji State Chaplain Rev. Kuzierang Thou lenisüba nung agi aser MLA tem den sarasadem telok balala nungi züngsemtem aden.
Tebilemba lemsatepba mapang Chief Minister, TR Zeliang-i tesentepertem dang Nagaland atema sarasademtsü atema mepishia metetdaktsü.
“Asen state ketdangsübaren nung ochimashi tera yanga lir aser iba ya atsüteta endoktsü atema sorkari loktiliba nung nisung ajak nungi teyari aginür. Asenok ajaki ochimashi indang jembir aser ochimashi maliba state ka kümdaktsünür saka shingaia iba atema mapa inyaktsü tebilemtsü mabener” ta chief minister-isa ashi.
“Asenoki clean election indang jembir saka temenen mapa maneni inyaker. Temelenshi ya sorkar kija agidangbo bener marutettsü. Iba asoshi yimsüsür ajaki mulungba telatetba ka alitsüla. Mizoram nung clean election agir süra, kechiba Nagaland nungbo magitettsü?” ta T R Zeliang-isa asüngdang.
Naga yimten tebilemtsü atema jembidang, “Naga nunger ajaki yimten latettsü atema sarasademer saka telemtetba tajung kabo magiteter. Asenoki state nung yimjung atemabo jembir saka shingaia yimjung atema süoki ia mapa inyakba mangur. Tetenzükdak ka alitsü ta ni bilemer aser ibaji temaba jenjang nung asütsüla. Ozü sorkari teti atema yijung bener arutsü atema süoki ia mapa inyaker” ta paisa shisem.
“NBCC-i tongti shilem agitsü atema ni tebilemba ka shidanger. NBCC-i tribal Hoho tem aser NNPGs külemi sabang ka nung longjemer Naga yimten latettsü atema mapa inyaktsü jaoktsüla. Tanü tensa melenogo aser iba mapang asenoki olemteptsüla. Iba ya asenok ajak longjemer telemtetba ka agitsü atema Tsüngremi moatsüba maongka ka lir, anungji asenoki iba ya mesüidaktsüli” ta T R Zeliang-isa ayongzük.