Nagaland sorkari Lokayukta Bill agizüktsü atema süoki ia bilemer

Kohima, November 17 (TYO): Nagaland sorkari Assembly nung Lokayukta Bill benoka agizüktsü atema süoki ia bilemer, ta Chief Minister T R Zeliang-i ashi.
Brihostibarnü Public Coordination Committee (PCC), ACAUT aser Public Service Aspirants of Nagaland (PSAN) nungi züngsemtem den pa indang residential office nung sensaksemdang, “state aikati Lokayukta Bill agizükogo saka onoki tamasa iba ajanga nübortem junga tenzüker asü masü ta asüba shisadangdi” ta T R Zeliang-i ashi.
“Onoki Lokayukta indang tajangzük aser tamakoktem jungjunga reprangdangdar, kechiyong onoki iba ya Vigilance Commission ka ama dang mekümdaktsünür. Asen state nungi ochimashi agientsü atema onoki tajungtiba agi mapa inyakdar aser nübortem ajangzüktsü atema onoki inyaktsü” ta paisa shisem.
Paisa Nagaland Lokayukta Bill 2015 indang Select Committee dang Hombarnü ACAUT aser tangartem den senden ka amentsü atema tetuyuba agütsü.
“Committee-i Assembly nung report benokba sülen onoki bill ji agizüktsü” ta Nagaland Chief Minister-isa nangzük.
PWD (Housing) Parliamentary Secretary aser Assembly Select Committee on Nagaland Lokayukta Bill 2015 Chairman, Levi Rengma-ia ashiba agi, “terenlok maliba aser tejaklen maoba ya ochimashi ajanga lir, anungji iba ya samatsütsüla.”
Select Committee-i State Assembly nung Bill mebenokdang shisalemsatepba mapang aiben agia arudar, kechiyong ozüng kübok iba Bill asoshi teinyaktsü aika lateta lir. Linük kübok state 24 nung Lokayukta tenzükogo, anungji asenoki item state kar semdanga Lokayuka ajanga ochimashi agienba inyakyimtem shisadangtsüla, ta paisa metetdaktsü.
Chief Minister-i tuyuba ama Levi Rengma-i November 20, 2017 nü Assembly Sub-Committee aser ACAUTd den Select Committee senden ka amentsü ayongzükogo.
Sendenji nikongdang 1:00 ako nung Assembly Secretariat nung Committee Room nung amentsü.
Iba senden nung PWD (National Highways) Minister, G Kaito Aye den tangartem aden.