Nagalima Tasenba Asoshi Mera Mejakok Tenzükogo

– S. T. Yapang Lkr. Kohima.

(Yashi adok nungi…)

Tekalen shia aliba keno indang tera shisemnür; iba keno nung okadak nungi tetuyuba agütsüba dak ajemdaker, aibelener tzümartem tenüng, parnok alidak, aser kechi inyaker, kechi züklem nungi item ajakji tejangja osang kaket ka nung ananü ashishia adoktsütsüsa aküm, sen kwikashi aotsü ta asüngdangtep nung merijang neter dang timba adoktsü ta angashia koma asütsü memeteti onok RTI Initiative Nagaland telok jitaka ayu, kechiyong kü tenüng nung keno benoka liaka tetenzükdang yongi senotsü bushiteptsü ajakji teloki khuret abentsü jembiteper ang tenzük nungji, iba senotsü kong nungi bushitsü ta anogo aser mapang jenti lalua bushitepa alidang Legal Service nung teyarinür Advocate Alemwapang Imsong pai lenmang tajung sayuba yong Nagaland State Legal Service Authority ajanga onok RTI Initiative Nagaland telok nem 50,000 tashi agütsüba asoshi pa aser Department dang kanga pelar.

Onok telok ket nung sen kata makai tenzük, saka Tsüngremi lenmang tajung lapoktsüa teyarinür nübu tajung ajurushidaktsüba yong senotsü lenmang nguteta iba osangkaket nung adoktsüba taa 49,200 indoker ano sen 800 onok ket nung anünga lir, kechiyong züzüa aonü amena aben ama, iba sen nguteter jembitep nung osangkaket Eastern Mirror Editor-i 30% ajemtsüa senji 49,200 dang adok, anungji pa danga pelaba shisemer, iba den RTI Initiative Nagaland ngutepkaket telok nung külem ketdangsürtemi mulungsoa sen tanguba ajak amoktsüba ajanga maparen tenzüktet, kechiyong kü kija tenüng nung senotsü meshia mali aser kü tenüng nung sen agütsübaa mali, teka nung kecha makai tenzük, saka tang onok RTI Initiative Nagaland ngutepkaket telok ket nung ano sen 800 anünga akaba nungia tammangdak milen tilaka danga tsükloktsünüa bushia senzür, shiri iba tammangji sayudir, onoki yangji iba milen tilaji tsükloktsütsü tashi ajak agi merangtsü. Ashishitep liang teli, nüngsen adokang tadok, aji kü dang aser onok dang teshi mesüra ashiyonga aji agi Nagalima tasenba nükla samatsütsü makok.

Maneni kasa keno asoshi senotsü nüngdaka aliba mapang The Naga Blog ngutepkaket telok nung ketdangsür Yanpvuo Yanfo Kikon-i ayongzüka temulungertemi tenla bendentsütsü apusoa TNB züngsem den ano tenla bendenba osang mopunglushi telok balala nung osang belenshia shirnokisa tenlaogo ajak dang kangasa pelaba shisemer, talisa tetenlar rongnung Nagalima adena orr alir nisung timba ngua onok tali ajungmesor, ibaji reprangdang nung Nagalima adena oa alir lanurtemi Nagalima yanglushinüa arungbaji jangja reprangtettsü, tejangrartemi The Naga Blog mesüra RTI Initiative Nagaland www.facebook.com/groups/RTINagaland nung yia reprangra shibai sen kwi kodang inoktsü aser item tenla senji koma koda amshia ali ajak satakjema angutsü. Iba tenlaba sen ya ‘Nagalima yanglushinüa ajepba nüktzü sen’ ta onoki agizük. Senji kodanga teperi maka, saka tang tsüka arungba tapok tangbangtsü asoshi periatoker asünungji TNB ketdangsür den jembiteper “Tenla bendenba anener” ta August 14, 2017 anogo sangdongba sülena August 28, 2017 anogo tashi nung maneni nisung pungui tenla inoktsüa ajak senteper 29,750 jungogo, aji temulunger nisung 59 tashii tenlaba lir, ashiba ama tenla bendenba August 14, 2017 anogo nung anenadoker asünungji kari iba osangji mengujemi lira ya agi peritsü junger. Ano okadak keno benoka aliba ajak nung teyarir aser tetenlar lir, saka kibur den masüngdangtepi mesüra keno metembangi parnok tenüng mesüra senotsü olioraba metetdaktsütsüji mapang mesüteper.

Lenmang külen nungi shisadangra maparen aika nung asenoki asenoksasa külakoker asenok timtemer dang, aser tarutsü asoshi mim mozü proker, tatishitsü agi ner süngjanglijang lu asoshi senotsü teyari aginüdang tulur dang kü nem 10,000 kua aser iba alu tenüng nung na sen kwi agizüktetdir agizükang ta bendanga agütsüra yangji nübur asoshi aruba sen lakh ana asem inoktsür, aser yamaji meshira senotsüji angutsü saker. Yamala inyakyim bushisüngdanga arudang nai hau senji ni shitak nguogo ta shira, ochimashi liaka aibelenerji kodanga meputettsü aser iba mim mozü jaki kenü ne dak nungi jakzükertem ang atongtsü akok. Ano tamalena atalokogo, yimden yimsüsürtem den angatetteper “Onok iba keno angatettepa tembangogo, shibai alia odir yimdeni bushitsü” ta amala peisasa pei külakokba aser ozüng agi kangshia tekülak mapa inyakba yaa memelenshira Nagalima tasenbaji Israel nunger anogo lir agi küm lir aküm ama asütsü akok mesüra 2 Chubatem 6:24-7:20 nung shia aliba ama, Samaraia yimti Syria temeranger lisem ama mezüngdangteti arua lungbanger ayawara tulu ajurushira pei chirtem soa achitsüsa tensa ka nung lia Elisha-i Tsüngremer osang “Asüng iba mapang nung am tanük touzük ana shekel ka yong Samaria süngkhüm nung ayoktsü” ta ashidang chubar tanishir kati, “Ajiang KIBUBAi anüng nung kichibatem yanglutsüdi asüyonga aji takoktsüama?” ta mamangteti langzütsüsa Israel lima tsükchir agi longbanger oda nisung tsütsü nungibo teimlatsü kecha malitsüba tensa nung liasü, idangjisa Tsüngrem nisungi “Ajiang nai ne tenük agi aji angutsü, saka ibaji machitsü” ta ashi aser iba amaji atalok,  yamaji tanü Nagalimaji nisunger tsütsü nungibo tajungbaji kodanga makümtsü amai bilemera alitsü, saka Tsüngremi iba Nagalima tasenba koba nung ashikülaker aser ochimashir mali mesüra election maka yangji na aser ni tamang makaba yong kenü danga lishitsü songtemra koda tejashitsü asütsü!.

Iba Nagalima tasenba nung obendangba yim koba asen tetsü tebou nungi benshia aru; iba ajanga obendangtsü ta imlar. Asen sobaliba dak sentakba okadakbo taochia lir, ano temetongshiba ajak lir, aser temerenshia yakta keno mekonga mesüra atsülanga meyui tanüsa tanü mesüra talangba agia asüngbo ta tembanger. Okadaki aotsü asoshi sen bushitsü mesüra okatsür asoshi tebilemtsü maka. Ya alijak nung tajungtiba obendangdak ka südi, iyongjiang Nagaland State akümba otsüsütsü onük tertrok züngya 9 (b) 2. nung Naga nunger asoshi ‘The Naga Tribunal’ lapoktsü ta shia lir, ya jilia Tsüngremer sentong asen den inyaka ataba maparen ka ta bilemer. Ibai asen Naga nunger asoshi par India nunger asoshi Supreme court dang temaba süla, saka lapoka maka aser nüburia aji memetet asü asen temeten sadema jembidak kilangji melapoknürar kecha ola osüng makai aru, saka aji kodanga melapoktsü tabo mali, ashiko aji memenui lapoktsü akok. Asen sobaliba nung aketba okadak ajak dang tajungtibaji keno benokeri tatsütiba agi aser tebang agia benoker, yangji keno benokeri oyim timi mezülu ta, mapang peria magütsüi okadaki keno aben ta ashishitsü metpur dak temeten mali, aser aji ang alijak nung ochi merüba aser tsüngchir kin, makokeri oda tenüng aser yim, kidong tejangja shir dang tekolaka tangzükdaktsüba ochishir aser tasü tait kin ta jangjar. Yimsüsür, adianu aser kinunger kar mapa tamajung nungji pungsema lira, aibelener rongnung jagi pa/laji tama tenüng tuteta jar temerenshi agütsür, yamala obendangdak shibai maginütsü?

Tatemsa Nagalima tasenba asoshi jembitsü/zülutsü dang inyaktsü timba aser aji pa/lai dang inyaktsü ta maka, asen Naga nunger yimkongi aibelenogo aser asenok ajaki Tsüngrem dang tadok meshitsü langja langa lir, tilatiba aser tatishitsü o ka agi tembanga shinür, shitakba aser ochibaji bushidi asünung tang asen Nagalima Christian lima ka nung arogo toklang tenzüker aika arogoi anentsütsü asü tepuokdaki aotsü? Ana rongnung ka shimtsüsa akümtsü, kechiyong missionary mesüra Rev/ Dr ta sannüker item aikati arogoi pa nem ita sen merijang metsü semer mesüra iba dang timba agütsür, saka pa/lai pei chirnur scholarship aser ibala mesükba teyari aginüdang küm nung par kibongi rongsen merijang 50 mesüra lakh ka dang arur ta meyongnem agütsüba nia tejangja ngua lir, tanü parnokji bushir masü ako, oda asenok ajaki Tsüngrem tsüngdang aibelenogo, anungji tangar masü asenok melenshidi aser Nagalima tasenba nungji asenoka kenü anogo danga lishidakjang ta Tsüngrem dang meshizükdi ta asüba nung ayongzükerba dang.

Na ner kinunger ajak melenshirang Nagalima asoshi apusotsü ata teli, ajak junga alibaji tajungba, saka ner kinunger menen nung na arakseta asütsübaji ang tamajungba. Nagalima tasenba asoshi nai memeneptsüsa apusoa mao ako, ano aka ka ta mejakoka mao, saka mena alidang nungi, tangar aitsüa kazü dang nungi apusotsü asoshi nokdakbaji tajungba. Nai manidaknüaka kecha masü, saka arungma, Nagalima tasenba asoshi mera mejakoka aodang na aji aitsüa mesüra koma mejaoklir ta repranga kazütsü asü, na alidak ne temeküt nung ne shilem nai akokba ka inyaktsüar ka shimtetangma. Tsüngremi Nagalima tasenbaji iba osang züngshir timbaka nem ngudakjangma, Amen.