National People’s Party-i election manifesto sayaogo

Tsüklai 13, 2018 nü NPP office, Dimapur nung party indang election manifesto sayaba sentong nung NPP state ketdangpurtem- Nillo Rengma, Vicashe Sumi aser tangartem tangokba noksa nung angur. (Dimapur, Tsüklai 13, 2018).

Dimapur, Tsüklai 13 (TYO): Sangtennü (Mongolbar) National People’s Party (NPP)-i Nagaland Assembly election atema party indang election manifesto sayaogo, aser parnok indang manifesto nungji, asen nükjidongtem tongtettsü atema yimjung, terenlok aser yimtenren tashitait yangertsü nangzüka lir.
NPP manifesto ji state official Nillo Rengma-i sayatsü, aser iba manifesto nung, India sorkar den temaba jenjang nung ken o jembia tekaratiba nung Naga yimtenren onük latettsü atema Naga tribal hohos aser lokti tentettem nungita inyaktsü, ta nangzüka lir.
NPP-isa, Nagaland nung aliba Naga nunger dang masü saka iba denji külemi Nagaland adener aliba Naga nunger tsüngda temeimtep aser telongjem atema inyaktsü, ta nangzüka lir.
Party manifesto nungsa, Central sorkar dang Nagaland nungi Lok Sabha aser Rajya Sabha naprongla nung MP menden tali lemzükjang ta takhangba agüja inyaktsü, aser ibaji ajanga sorkar asalentong aser terenlok mapatem nung asenoki tang dang nungi shilem tuluba agitettsü, ta shia lir.
Party-isa Eastern Nagaland nung terenlok atema inyaktsü aser state nung terenlok junga maliba tesemtem nung rongsenkettsüng schemes benoktsü aser tarutsü nung tajangzük angutsü atema inyaktsü, ta nangzükogo.
Parnoki aika nangzüka aliba rongnung- airport, railway station aser gari lenmang tesendaktep jenjang ajungkettsütsü, tourism industry ajungkettsütsü, tanü putu den apet healthcare facilities tajung agutsütsü, aluyimbaren nung terenlok, mapa mengui alir lanurtem nem skill development aser light power junga agutsütsü nangzüka lir.