Neiphiu Rio-i Khekiye K. Sema indang osang aitsür

Dimapur, July 18 (TYO) : July 16, 2015 nü Khekiye K. Sema-i osangkaket nung Imkong Imchen ji NSCN (IM) tetuyuba nung ajemdaker DAN III Ministry nung shimok ta sangdongbaji tiyazü ta taoba Nagaland chief minister aser tain LS MP teinyakdak, Neiphiu Rio-i tanü sangdong ka ajanga metetdaktsü.
Council of ministers nung züngsem anioktsübaji Chief minister ka teinyaktsü lir aser iba nung ajemdaker lennir tejen rongnung ka, Wb. Imkong Imchen DAN III ministry nung aniok. Iba ya seniority nung aser pa temsüa aliba nung ajemdaker aniokba liasü, ta Rio-i sangdong nung shia lir.
Telok shingaia Wb. Imkong Imchen ministry nung shimoktsü atema tetuyuba magütsü aser Khekiye K. Sema-i tiyazü nung aitsür. Iba amala tiyazü osang aser matalokba onük ammeter nisung aitsübaji majung, ta Rio-isa shisem.
Tamasa kuli tejangja bushiba aser anguba sülen ang item osang sangdongtsüla. Ibala osang tiyazü ajanga nisung ka jenjang raksatsür aser tenüng menüktsür. Anungji tebilemtsü khuret abenertemi yimjak nung tiyazü osang meproktsüla, ta Nagaland Lok Sabha MP-isa sangdong ajanga metetdaktsü.