Nisung taküm mapayur

September 02,2017  aonung Kohima aser Wokha na tsüngda Chiechama nung nisung anati taxi anishir ka tepseta yutsüba tatalokba otsü ya asenok ajak asoshi taoksatsü, tetsübutsü aser tesasatsü otsü ka lir. Nisung tepseter anapronglaji Naga nunger linük tenzükertem liasü aser nisung tepsetba kuliji taxi gariji aginüba agi liasü. Iba tatalokba ajanga Naga nunger ajak atema kanga shisabolua bilemtsüsa tasüngdangba ana arur. Kaji, Naga nunger linük tenzükertem agi rakzükratemer aser nisung tepseter akümba ya asütsü, aser ano shisabolutsü kaji, taxi gari ka atema nisung tepsetbaji asütsü. Iba tashiji Naga nunger linük tenzükertem jenjangi aluadokogo aser Naga nunger linük tenzükertemi nisung taküm ka dang nungibo taxi gari-ang taoba bilema inyaker. Angazükba agi, taxi gari anishisang ya kanga meranga inyakba lanur ka liasü. Iba taxi gari ya pa meyong aser iba gari anishiba agi par kibong mesür. Aji oda, linük tenzükertemi iba ama meranga inyaka pei kibong mesütetba Naga nunger lanurtem ajungshia yarisemtsü melen gari rakzüka bener aotsü mechi nisung tepsetbaji Naga nunger tarutsü jenjang raksatsür asütsü. Tanübo nisung tepsetertem puteta apuba agi tejangja osang metetter saka Nagaland nung anogo shia tesem ajaklen iba amaji nisungtem amokmerena saru saruba aser akoksadaktsüba mapatem atalokba aika memeteti süidaktsüdagi. Iba amai pei nübortem asoshi yimten nüchiso bushirtem agi rakzükratemer aser nisung tepsetertem küma aoba ya, balaka, Naga nunger linük tenzüker teloktem ajak asoshi tebilemtsü tulu lir. Naga yimten tebilemtsü ya India den jembia latettsüba ken o ka lir saka India-i akok tashi Naga yimten tebilemtsü ya telatetba kati marudaktsüi mapangang atsülangtsü merangba asenoki reprangtetter. Iba tasa nungji asenok kanga akoksadagi. Joko, putu yimya agia memelar asünungji, asenoki kodanga arem nung lia, süngolio mejaka, pei tetsü tasoli yimten nüchiso atema meraratsü. Aji oda, tanübo yimten nüchiso asoshi rarartem ki tajungba nung lia, garia tajungba nung senzüa kidang chiyongtsü tajung tatsük talem chiyonga inyaker. Iba ama anü tatsük mepudang, tsünglu majaokdang aser arem nung bangchi aser pezünu merila agi memetepdang pei yimten nüchiso asoshi jembiba agi, jembia jembia süoki maiba maiba jembir aser yimten nüchiso bushiba tetezü aser nükjidonga mejangjai ka kümadoker. Tang asenok iba tia nungji lir. Aji oda, joko linük tenzüker tulur aser tilar ta mali, shingaia Naga nunger yimten nüchiso angutsüba temeten aser teimla indang mejembir. Kar rongsen bushir, kar meshimetsüa senzür, kar rakzükratema nisung tepseter ta linük tenzüker agi linük tenzüker memesük asenoki asen lima ya tetsübutsü lima ka kümdaktsüogo. Aji oda, sen dang ngura nisung taküm samatsütsüa apayua mali, mapa tilaka yong mesüra gari tilaka mechi nisung tepseta endoktsü mapayur ta  asüba limaji asangsang nung masü saka cinema nung anguba lima-ang ka mesük. Iba ama lima nungji asenokbo asangsang nung alir. Iba limaji asenok ajak longjemer yangluba lima ka lir. Asenoki takok ngunüdang nisung tamajungertem amshir, anungji asen lima nung tamajung mapa inyakba ya sen aaba mapa tajung ka amai kümdaktsüogo.Aji oda, asen lima nungbo government mapa kar sübokrem agi aser kar amokmerenba agi ta dang angur, anungji ochishia shitak inyakba mapabo kata mali kümogo. Iba ama tensa tia tamajungba ya ochi agi aser pei tetsü tasoli meimba shisatsü agi dang anendaktsütettsü. Joko, telong aser tema nung alir yimsüsür aser lenirtemi pei kija agitsü rongsen dang mebushii, talisa, lanurtem nem pei lima yimten temeten angatetdaktsütsüla aser pei tetsü tasoli meimba shisatsü enoktsütsüla. Pei yimten temeten angatetba aser pei tetsü tasoli meimba senso kati kodanga rongsen mechi nisung metepsettsü aser pei lima aküm aser tenüng memenentsütsü.