NPF (TR-NR)-i Dr. Shürhozelie o meyiptsür

Dimapur, November 18 (TYO): Dr. Shürhozelie Liezietsu-i majority NPF (TR-NR) dang minority telok nung adentsü jaokbaji temenünütsüka aser tammetdak kecha mali. Dr. Shürhozelie-i inyakba mapaji Naga nunger sobaliba den tesendaktep kecha mali aser pa ama tain kati o mashi jembibaji kanga mazü, ta NPF Press and Information Cell-i sangdong ka nung metetdaktsü.
Shitakba agibo Dr. Shürhozelie-i telok tuluba NPF (TR-NR) den adentsüla sernung pai pa noktaka aliba jenjang masadangi o jembir.
Democracy nung aser talisa party inyaksangshi nung nübo teimbaji kanga tongtipang, anungji telok tuluba kati telok tilaba nung adentsübaji tim masü. NPF Party tamaitsü noksa mangatettep nung CEC nungi nübo teimba den MLA tem teimbaji Rio-Zeliang lenisüba kübok dena lir. Anungji, telok tulubai tilaba den adentsübaji nüngdak madoker.
Party nung lenisüba melentsü atema onoki bangzünga renemer noktakbaji tanga tashi kecha agia masü saka Democracy tashi aser telok tulubai adokba ola ajanga lir. Dr. Shürhozelie-i pa mulunga agidang telok aniba maginüba agi onoki parnok toktsü.
Alima nung electoral politics nung telok tulubai mulungba agir, anungji telok tilabai tuluba indang ola nembangtsütsü memerangtsüla. Dr. Shürhozelie-i ‘kü dangi arung, kü den denang’ ta olentem ajanga onok jaokbaji magizüker. Iba ya tajung bilema jaoker masü saka onok ajembangtsü atema inyakba mapa ka dang lir, ta NPF Press and Information Cell-isa metetdaktsü.