NPYC-i Indira Gandhi sor küm 100 ajungbamong among

November 19, 2017 nü NPYC ketdangpurtemi KODH nung aliba tanurtem den Indira Gandhi sor küm 100 ajungba anogomong amongba sentong nung tangokba noksa nung angur. 

Kohima, November 19 (TYO): Tanü Nagaland Pradesh Youth Congress (NPYC)-i Kohima Orphanage & Destitute Home nung aliba tanurtem den külemi Indira Gandhi sor küm 100 ajungba anogomong among.
Iba sentong nung jembidang NPYC Tir, Vilhousielie Kenguruse-i, Indira Gandhi Ato kilonser kümli lai ceasefire agreement agi aser FGN/NNC delegates den trokben round tashi ken o jembia liasü, ta metetdaktsü.
“Ken o jembiba anen, ajisüaka la inyakba mapang nung Nagaland yimtenren sorkari tezüngzüktep agi aser tebilemtsü shilem karbo koktet,” ta paisa metetdaktsü.
“Iba mapang nung NNO (tamalen Congress party)-i onük ter nung ajemdaker INC nung aden, ibaji ajanga linük nung Nagaland nem maongka balaka agütsü,” ta paisa ashi.
Indira Gandhi-i Naga nunger tebilemtsü onük kanga akhümtsübu, la mapang nungsa Shillong Accord tezüngzüktep agi aser yimtenren dak sendakba nung puoka alir 700 dak tema tepoukdak balala nungi chiok, ta paisa metetdaktsü.
Indira Gandhi ya tasütait aser mapa tajet lenir ka liasü, ta shia Kenguruse-i, “Congress aser Naga nunger tenüng nung NPYC-i la sor küm 100 ajungba anogomong nung la nem akhüm agüja bilemteter,” ta shisem.