NSF-i ayongzüka aliba ama lokti senden akatsü

Kohima, Aenjeti 18 (TYO): Election Commission-i State Assembly election agitsü atema sangdongba aija tanü Naga Students’ Federation (NSF)-i, ‘election magidang Naga yimtenren onük latettsü’ atema nokdaker, ta metetdaktsü.
Yashi Election Commission-i Nagaland nung assembly election agitsü sangdongba sülen tanü Kohima nung osangbenertem senden ka nung jembidang NSF Tir, Kesosul Christopher Ltu-i, “NSF nung tamalen tenzüker ketdangpurtem aser tang teinyakdak ketdangpurtemi India sorkar aser Naga nunger tenüng nung jembir teloktem dang Naga yimtenren onük tekaratiba nung latettsü atema mepishia arur,” ta metetdaktsü.
Iba senden nung NSF Tir, Ltu den tongti tezülur, Imtiyapang aser Education Secretary, Boketo Kiho nata liasü.
“NSF-i India-Naga yimjung ken o jembiba nung shilem agia aruogo aser tebilemba aika lemsatepogo. Yaküm October ita nunga NSF nungi züngsem teneti akumba telok ka Delhi-i oa Interlocutor, R N Ravi dang Naga nungeri yimtenren onük latetnüba lemsatepogo. Iba mapang nung Ravi-i tebilemba aika lemsatep aser benjung mongpu matongdang yimtenren onük latettsü ta ashi,” ta paisa metetdaktsü.
Tesasaba olen ka nung pai, “Ravi ajanga India Tir aser Ato kilonser nem temepishiba aika agütsüogo, ajisüaka onoki mepishiba magizükba atema onok mepelar, aser asen nübur taginüba khenyongi sendoka yutsüogo,” ta ashi.
Ltu-isa, tesüiba anogo ishika tsüngda Naga nunger tongti tentettem aikati India sorkar dang election atsülanger India-Naga yimtenren onük latettsü atema temepishiba shidi agütsüogo, ajisüaka India sorkari Election Commission ajanga election agitsü sangdong, ta ashi.
Election agitsü sangdongbaji NSF-i magizüker, ta shia Ltu-i, NSF-i ayongzüka aliba ama Aenjeti (Jan) 23, 2018 nü Naga Solidarity Park, Kohima nung public rally agia “election masü yimtenren latettsü” atema takhangba agütsütsü, ta metetdaktsü.
Paisa, ECI-i election agitsü mesangdongdang yongi NSF-i rally ayongzüker liasü, ta ashi.
Paisa Naga nunger ajak dang iba rally nung shilem agia adentsü, aser tarutsü nung NSF-i mera agia inyakba nung nungita adentsü mepishia metetdaktsü.
NSF-i elections nung shilem magitsü asü? ta asüngdangba langzüdang NSF Tiri, iba rally agiba sülen shisa lemsateptsü aser Presidential council senden ka ayongzüka election dak sendakba nung o lemtepa tatembangbuba telemtetba ka agitsü, ta metetdaktsü.
Kaketshir tentet kati yimtenren inyakyim nung madentsüla ta taitsüba aliba dak sendakba nung pai, “Kaketshirtem aser lanurtemji loktiliba nung tarutsü lenirtem lir, aser Naga yimtenren onük nung ken o aser tezüngzüktep kechi agidir, ibaji ajanga Naga nunger tarutsü tia latettsü,” ta ashi.
Paisa, “Kaketshirtem aser lanurtemi yimtenren onük nung adenbaji kanga tongtibang, kechiyong Naga nunger tarutsü atema onok ya tongti stakeholders lir,” ta shisem.
Ano külen Ltu-isa, NSF-i state nung kaketshirtem atema inyaktsü aser scholarship magütsüi aliba, school uniforms den text books aser MBBS den Agri-allied NEET Exams onüktem atema inyakdar, ta metetdaktsü.