NSF-i Naga yimten tebilemtsü atema sentong ayonger

Dimapur, Aenjeti (January) 12 (TYO): Aenjeti (January) 23 nü Naga Students’ Federation (NSF)-i Naga Solidarity Park, Kohima nung lokti sentong ka alitsü ayongzükogo.
Taruba Nagaland State General Assembly Election magidangsa Naga yimten latetang ta India sorkar dang ashitsü atema iba sentong alitsü ayonger, ta NSF General Secretary, Imtiyapang Imsong-i sangdong ka nung metetdaktsü.
Naga nungeri pei sasa ketdangsüa aotsü atema tashi meshibaji Naga yimten lennirtem kija atema masü saka Naga nunger ajak tarutsü atema lir. NSF-i lanuputu indang taginüba aser tangatetba atema noktaker aser tanü tashi Naga yimten melatetba atema maneni mepelaba ola adoker, ta sangdong nung shia lir.
Küm 20 dak tema yimjung olemtep liyonga aruaka aser ano Luroi (August) 3, 2015 nü Framework Agreement sign sütepaka, Naga yimten tebilemtsü tali tebenja akümer ama ajiteter. Taküm Nagaland State Legislative Assembly indang election agitsü mapang tonga arudang nübortem tali ratamadaktsütsü ama temulung melemi bilemer, ta NSF-isa metetdaktsü.
Assembly election agira tang olemtepa aruba atsülangtsüsa akümtsü aser ibaji ajanga Naga nungeri yimten latettsü atema mapa inyakba nung tetsükdaktsü ang ajurutsü. Anungji NSF-i tebilemtsü abenba Naga nunger ajak iba sentong nung arua shilem agitsü mepishir, ta sangdong nungsa ashi.