Ochiji Tsüngrem

Ochi ta asüba ya tebilemba masü saka shitakba nisung ama kümer aruba Tsüngrem chir Yisu Khrista lir. Yohan tapu 14:6 nung, “Ochiji ni lir,” ta Pai ashiba oren ka angutsü. Asenokibo asen meketa aliba tensa mapang aser tarutsü tia indang shitakji memetettsü saka Yisuibo item ajakji shitak meteta lir. Tetezü, asenoki bilemba, anguba aser ajuruba tensa tiaji kechiba arur aser koba ama ka nung atemtsü ta asüba shitakba aser ochi o ji asenok Yisui ashiba o mangashi tashi metettsü makoktsü. Yisui dang asenok taküm tia indang shitakbaji meteta lir. Iba jagi dang Pa dang Ochi ta ajar. Aji oda, asenok temenen agi tenük poker asenok nem angati agütsüba Tsüngrem temeim aser temoatsütem asenoki mangur. Tetezü asenoki ochiji memetet, anungji tiyazü taküm aser teimla nung asenok alir. Asenokji nükpoker, matumalem aser yiar ama ka dang lir. Iba jagi, Yisui ashir, asenoki Ochi metet nung dang asenok nüji akümtsü. Anogo shia asenoki ochi indang jembir, ajisüaka asenok atema timtem aser takoksa kaji asenoki Ochiji shiba-ar memetet. Aji oda, Yisu Khrista sülen jajartem Par nütsüngtemia Paji Ochia ta memeteti liasü. Iba jagi, parnok tzüyim yipru agi merenshidang, parnok kanga tsübua adok aser parnoki iba yipru lendong nung parnok samatsü ta bilem. Nütsüngtemji mongin ango purtem asünung parnoki tzüim yipru indang kanga junga meteta liasü. Aji oda, tzüyim yipruji onsara sashi nungji, iba ama tia ka nung parnoki metetba ochibaji, parnok samatsübaji tejangja ta bilembaji liasü. Ajisüaka, parnoki shitak amato bilemba ochiji tiyazü liasü. Ochi-i kodanga mesamatsür. Atangji, nütsüngtem den Ochi dena liasü, saka parnoki Ochiji tesülen amui oa toktsü. Iba amaji tanüa asenok taküm, kibong aser lokti nung ataloker. Nütsüngtem amaji asenoki inyakba aser ajangshiba maparen nung asenok ajak mongin asütsüa akok. Iba jagi asenoki metetba aser ajangshiba apia asen taküm aser kibong tiaji aotsü amai bilemer. Ibayongji, asenoki mepelatsüba ka nung kanga pelar aser metsübutsüba tensa ka nung kanga tsübur. Kodang nütsüngtemi Yisui mejanga aliba mesor parnok tesamar ta ashi (Luke 8:24-25), Yisui saker tzüyim yipruji arrtsü aser idangjisa süngjema aküm. Nütsüngtemi ochi memetetba agi parnok tesamar ta shisabolua liasü, saka kodang parnoki Yisui jembiba angashi, idangji dang parnoki Ochibaji metet. Atangji, iba anogo jakdang nütsüngtemi parnok tesayur Yisu Khristai sayatenya mapa inyakba aika ngua liasü. Ajisüaka, parnok taküm lendong nung alidang alima tzü mopong madak dena tashi amshiba Ochijibo parnoki mengudangi liasü. Ashi, iba Ochiji metet nungbo tzüim nung yipru lendong tuluka aruaka parnoki metsübula. Asenok taküm nunga aiben yamaji ataloker. Asenoki meteta Tsüngremi asenok moatsür, aneptsür aser kümzüker. Aji oda, Tsüngrem ain nung asenoki mojing sentong madak takok angur. Ajisüaka, khenkhen kodanga mengudangba aser majangshidangba lendong timtem tulu arudang asenoki tsübur. Iba ama mapang nung asenoki angatetba ochiji asenok samatsü mesüra asenok kanga takoksa angutsü ta asenoki bilemer. Ajisüaka, iba ama lendong mapang asenok jakdang aliba ochiji aji masü. Ochi-i asenok kümzüker. Iba ama mapang nung Ochi jagi ashir, ni na awabanga lir, alima yipru mopong agi na samatsütsü makoktsü. Atangji, asenoki tanü tashi Ochiji shiba aser kechiar mejangjateti alitsüa akok, mesüra asenok den Ochi dena lir ser nung asenoki Ochiba nemji manidaktsür asütsüa akok, mesüra Ochiba jagi asenok timtem memetettsüsa asenok sülen amui oa alitsüa akok. Iba ama tiaji asenok kidang ajak kar ser nung maka ama shisabolua aliba amai lir. Iba ama tia ka nung asenok samatsü südi ta tsübuseta bilema alirtem, arung, nütsüngtem amaji orr Ochiji mesodi aser asenok tebilemtsü shidi. Atangji, alima nung alir asünungji, asenok meketa lendong timtem jenti lir, iba jagi asenok shisamebululi asüyonga boludaktsür. Ajisüaka, asenoki Ochi dak amangra, Pai asen shisaboludaktsüba lendong timtemji arrtsütsü aser asenok süngjema akümtsü. Asenok taküm nung Ochi dak amangba agi nüji akümba temoatsütem rongnung ibajia ka asütsü.