One Direction ken tasenba iTunes Chart temaba jenjangi tuogo

July 31, 2015: Tebur temeja kentener telok ‘One Direction’ nung züngsem Zayn Malik-i par telok toktsüba sülen tang mezüng Hokolbar nü (July 31, 2015) ken tasen ka sayaogo, aser iba ken sayaba sülen ghonda ka tsüngda nung iTune Chart temaba jenjangi tuogo.
Taküm March ita nung Zayn-i par telok toktsüba sülen par teloki tang mezüng ken tasenba “Drag Me Down” sayaogo, aser iba ken tasenba ya studio kensep pongububa nung ken tongtiba asütsü.
Par telok nung züngsemtem- Niall Horan, Liam Payne, Harry Styles aser Louis Tomlinson nungeri iba osangji parnok meyong official Twitter account ajanga sangdonga liasü.
“Surprise ka! Onok ken tasenba angadangang! Ken nüngjaji ‘Drag Me Down’ lir aser onoki meimba ama nenokia kasaji meimtsü ta ni imlar,” ta Liam Payne-i Twitter ajanga osang lemsatep.
“Nenoki meimtsü, ta tamang akar, iba asoshi onok nüma atanger,” ta ken tasenba sayali Louis Tomlinson-i Twitter ajanga lemsatepa liasü.
‘Drag Me Down’ ken ya radio ajanga mesaya mesüra iba ken ajungketttsü asoshi jelia sentong ayongzüka magi saka Hokolbar anepdang ghonda ka tsüngda iTunes aser Spotify charts temaba jenjangi tuogo.
Anogo ka jakdang taoba mapang par telok züngsem Zayn Malik-i, parnoki ken chichiba mejemtsü atema pai telok toktsü ta ashiba sülen anogo ka lir One Direction-i pa medenaka parnok junga odar ta kuli sayutetogo.
Iba ken tasenba ajanga Hokolbar anepdang 6:30 ako nung iTunes store aser Spotify Charts aoksadaktsüogo, iba sülen ghonda ana shi lir BBC Radio 1 nung kenji yoka liasü.