Ozü kümzüka ayutsüba mapang

Joko anüdok o anülulen na tsüngküm mongpo melentepba mapang asünungji tashikang dena alir tashibo talidak tesem tajungba bushia aoba mapang lir. Aji oda, taoba kümtem nung ajanga süiba amato taküm küma joko rüjep alaba agi tali majung mekongba limatem nungi molulem ozütem talem lima bushia aoba mapang yakta tenzüktsü. Angazükba agi, item molulem ozütem ya Russia aser Seberia limatem nungi Africa limatem bushia ayimer. Ibaji tesüngmangtsüka lir. Alimasa alima aser tzüimsa tzüim ajanga mopong nung parnok amongtsüba tesem shitak bushia otetba tashi aser tekolokji asenok nisungsa süaka asenok ama dang nungibo item ozütem kolokjisa tuluba ta angatetter. Tamalenbo item ozütem ya Nagaland tesem aisü nung telok telok arua monga liasü. Ajisüaka, asenok asoshi ozü shi ya chiyongtsü tajung asünungji asenoki parnok taküm aika samatsüogo. Iba jagi balaka tanü asüngbo akhidang amongba tesemtem nung masü saka Wokha district nung Doyang ayong anasa Pangti nunger lushi nung item ozütemji meyirijang aika arua monga kazür oa adoker. Atangji, ozü meyirijang aika amongtsübaji arem aser chiyongtsü nüngdaker. Iba jagi balaka asen lima nungbo item ozütem ya mamonger südi, kechiyong asenoki tsük lu mayimer aser ano ozü telok tulu arua amongtsüsa arem aser ayonga mali. Ano, arua amongka asünunga, ashiko, asenokibo temeima memeim, tapayua mapayu aser shiaka manga pua chimatsü. Ajak tia ajung, Pangti nungertemibo alima nung ozü taküm kümzüka ayutsübaji angateta lir, anungji ita junga ozü meyirijang aika aruagi parnok lushi nung amongyonga shingaia parnok meyirutsütsü. Iba jagi alima nung ozü amongdak Pangti nunger lushi ya kanga nüngtugu kümogo aser molulem ozü meyirijang aika arua monga kazübaji reprangi alima tesem balala nungi arur. Anungji, ozü reprangertem anir senzütsü aser parnok anepalutsü asoshi nisung shimteta ayur. Iba jagi parnoka sen aar. Ano, ozü reprangtsü asoshi tesem tesem nung semtu ajungketa yangluja lir asünungji item nungji mener anogo aoa memeteti ozü repranga kazübaji jangratemtsüka lir. Tanü limaji iba limaji kümogo. Joko, tanü lima ya prangpong aser lijak amer ozü kaa senzüba limato masü. Atangji, tang tashi asenokbo arem nunga masü saka ki anasai ozü tilaka aru majung prangpong aser lijak amer arishir. Ibaji asenoki alima nung ozüsangnutem mesamadaktsüi kümzüka ayutsü nüngdak ta mangatetba ajanga lir. Arem nung, alu nung aser ki anasa atsü nung ozü arua asabaji kanga temenungratsüka lir. Parnok asabaji parnok o aser parnok ken saka asenokibo mangatetter. Ajisüaka, parnok ola shia jagi asenok nema osang tapu balala metetdaktsür. Itemji junga mebilemdangi asenokibo pentsü ozü tilakata taküm meyutsüi kaseta achitsü meranger. Ozü tila süaka pentsü ozü ana asen ki anasa mesüra arem nung asaa senzüba to bilemdangra kanga lemlalemlar, ajisüaka asenoki item ozütemji arishia kaseter aser mi nung tsüka achia majung, aon asoa malang amajok nung topur tajung taküm samatsür. Joko, asen limaibo warotemia tetsübu agi marur aser pentsü ozütem olabo mangashir. Asenoka iba amai tebilemdang maka inyakba nisungtem nuh (?) ta kanga sasaa bilemer. Ajisüaka, tajung inyaktsü asoshi kodanga temenu maka, anungji asen limai aruba ozü aser shirurutem kümzüka ayu tenzüktsü asoshi tanü ya mapang tajungtiba lir. Joko, tanü nungibo aremi ozü akhai mouli aser asen ki anasa atsü nung ozü arubatem mesamatsüli. Asen ki anasa ozütem ola angaa alitsüsa asenoki asen alidak meketa süngdonglidongtem temdi aser yangji ozütem mongdaktsüdi. Tanü asüngbo prangpong aser lijak amer ozü khaa senzürtem aser tzü nung ango aputsü asoshi mozü enoktsürtemji mangatetba purtem lir. Item jagi alima raksar. Tsüngremia parnok dang mepelai alitsü südi.  Asenoki ozü taküm ka meyanglutettsü saka ozü takümbo aika kümzüktettsü. Tanü limaji iba lima aser tanü putuji iba putu lir.