Panel lawyer temi makamaitertem angati yaritsüla

Kohima, November 15 (TYO): Panel Lawyer temi loktiliba nung tashi malirtem nem angati legal services agütsütsüla ta tanü Gauhati High Court nung Judge aser Nagaland State Legal Services Authority Executive Chairman, Justice L S Jamir-i ayongzük.
“Panel lawyer temi asen linük nung aliba ozüngtem jungjunga metettsüla aser nendaka mapa inyaktsüla. Asenoki loktiliba nung jenjang teküpokba nung alirtem nem legal services angati aser tajung agütsütsüla” ta anogo asemnü Panel Lawyers indang Refresher Training nung jembidang L S Jamir-i ashi.
Iba sentong ya Nagaland State Legal Services Authority (NSLSA)-i SIRD Hall, Kohima nung ayongzüka agir.
“Lokti nung tangar memenepertemi ozüng dak sendakba ken o tem ajurudang private advocate nem taa agüja inyaktsü makoker. Iba amala mapang ajurudang panel lawyer temi parnok den angati agi ozüngren nung yariteptsüla aser ken o tem tekaratiba nung tembangtsü atema inyaktsüla” ta paisa shisem.
L S Jamir-isa Panel Lawyers dang pei pei district nung Para Legal Volunteers len anirtem asütsü atema tayongzükba agütsü.
Sentong nung NSLSA Member Secretary, Nino Iralu-ia o jembidang, Panel Lawyer temji legal services ketdangsertem atema tongtipang tongshitem lir, kechiyong parnok medeni lokti nung tangar memenepertem nem legal services magütsüteter, ta ashi.
Nagaland state nung panel lawyers 98 lir aser parnok rongnungi 28 iba training nung adener, ta laisa shisem.
November 17, 2017 tashi agiba training nung Panel Lawyers dang Centre aser State sorkartemi inyakba scheme aser facility tem indang sayutsü.
Scheme tem rongnung National Health Schemes, Construction Workers Welfare Schemes, Integrated Child Protection scheme, Resource Centre for Women, Right to Education, poverty alleviation schemes, People with Disabilities, rehabilitation of victims of human trafficking tem dena lir.