Pei dak nungi tenzüktsüla !

Ibai asenok ajak asoshi  ” Vigilance Awareness Week” lir. ‘Vigilance’ tetezü mita ataba aser ‘Awareness’ tetezü meteta aliba. Anungji, küm shia hopta kaka agiteta ‘Vigilance Awareness’ amongba nükjidongji goverment nung ochimashi mapa mita inyaktsü shimba ketdangsertem pei mapa nung tali tashi itshitsü aser nübortem nema pei lima nung ochimashi mapatem anema mita alitsübaji senso ka teinyaktsü mapa lir ta angatetdaktsütsü asoshi lir. Taküm 2017 küm India ajunga asoshi iba Vigilance Awareness Week atema shimtetba omenji ” Kü mangdang – Ochimashi maliba India” ta shimteter amonger. Tetezü, ochimashi mapatem kenyongi maliba linük ka asütsü asoshi India senso shiai merangtsü. Iba kasaji state sasep nunga ochimashi kenyongi meinyakba state ka asütsü merangtsübaji state nung yimsüsür aser ketdangsertemi anir senso ajak asoshi tayongzükba aser teinyaktsü mapa ka asütsü. Atangji, alima asünungji tai temenen kenyongi maliba lima ka amabo meyanglutettsü mesüra nisungtema kotak tenyar amabo melitettsü. Ajisüaka, alima ya molumia masü, anungji iba lima ya asenoki ochimashi inyakba mapatem ajanga molumi amabo mekümdaktsütsüla aser asenoka mojing amabo küma maotsüla. Tangbo asen lima goverment inyakyim reprangdangra ochi tilakata mangur, iba jagi government nung alir yimsüsür aser ketdangsertemia asenoki ochimashi mapa inyaktsüba ya shitak inyaker ama inyakba yimyasübaba mapa ka kümdaktsüogo ta metetdaktsüba angashir. Ibaji tiyazü masü. Iba tia nung asenok ajak Tsüngremi Pa mesükba nung yangluba nisung ser nung tulur tilar ajaki mojing kümer auyar, külaker, tashiyim amshir, mapa ajak senyong ayoker aser alir aser japujariteper. Aji oda, asenoki mojing ya tezü tepu tener tangalen nungi arur amai bilemer dang ashi, moijingji asenok lir. Joko, yimsüsürtemi anir tazüngba certificate tiyazü amshibaji yimya ka ama kümogo. Government mapa nunga tesayur aser police mapa tashi sen agi ayokba aser aliba indang tangari meinyaktetba mapa tuluka inyaktet amai jembir. Mapa meinyak ser sen agizüka agiba, tangar tenüng nung ita sen agizüka agiba, government contract aser supply mapa ajak nung joko 50%  tashi commission meshiba mapatem tim teinyaktsü inyakba ama jembiba angashir. Item ajak rongnung ochimashi aser takoksa tulutibaji anü müra pua yamaji jakdaka ochimashi mapatem inyakaka, talisa Nagaland nungbo, itemji mita alir-a kata mali amato akümba tensa tia ya asütsü. Atangji, tang ama ochimashi anema sensosangertemi mita alitsü aser raratsü ayongzükba mapang, state nung tematiba tashi amsang governor aser Chief minister-i sensosanger ajak ochishia alitsü aser ochimashi mapatem anema inyaker kaka akümtsü ayongzüker. Ajisüaka ano külen parnoki sensosangertemi ochimashi mapatem puteta metetdaktsübatema dena bushisüngdangtsü memelar aser  ochimashi mapatem anema ola adoktsü asoshi sendena melidaktsütsü nokdangba ngua aruogo. Nagaland nung yimsüsürtemi o balaka aser mapa balaka ta inyakbatem yamaji jakdaka angur. Ibaji tejashitsüka aser iba jagi ochimashi anema nokdaktsü nokdanger. Tanübo Nagaland government mapa nung inyakertemi ochimashi mapa jakdaka inyaka liaka kecha mesütetter, kechiyong ibaji Secretary, Director, Minister, chief minister aser Govenor nungi temelaba magütsüra meinyaktetter. Aji oda, ochimashi anema mita alitsü aser nokdaktsü jembiaka, ochimashi mapa anema nokdaktsübaji Governor-bai, Chief minister-i, minister-i, Secretary-i aser Director-i ibaji kü dak nungi tenzüker ni tama inyaktsü ta nangzükba ama mapa küma meinyaktet tashi küm shia ‘Vigilance Awareness Week” amongba ya auer kidang mauyatsü jembili ano tuluba-ang auyali ta asüba amato asütsü. Atangji, ochimashi anema inyaktsü asoshi kechikomaka ozüng takang yangludir yangluaka, asenok memelenshira aser asenok dak ochi inyaktsü tejangraba aser temulungtetba melira asen lima nung ochi agi anüngtsü. Ibaji tang asoshi timtem aser tarutsü atema lendong tulu lir !