Pervez Musharraf-i ‘Grand Alliance’ tenteter

Islamabad, November 11 (Agencies): Pakistan nung taoba tir Pervez Musharraf-i yimten telok 23 den “grand alliance” yangluogo ta osang angazüker.
Iba teloktep dang Pakistan Awami Ittehad (PAI) ta ajatsü aser arishi küm 74 tain Musharraf-i len anitsü. PAI nung tongti tezülur inyaktsü atema Iqbal Dar shim.
Dubai nungi video conferencing ajanga osangbener den jembidang Muhajir (migrant) pur dak alaka, yimten telok ajak longjemtsüla ta paisa ashi.
Paisa, Muttahida Qaumi Movement (MQM) aser Pak Sarzameen Party (PSP) dang teloktep nung adentsü pelashishia jaok.
Musharraf-i MQM nung tekolak mapa inyaktsü akok ta osang kar jembiba atema pai ashiba agi, “ibaji temenünütsüka lir.”
“Tang aliba MQM-Pakistan ji taoba original party alidang tesadang ka shi dang lir. Iba party sasep nung mangatettep alibatem atema ni tebilemtsü abener, ajisüaka teloktem longjemyonga ni Farooq Sattar mesüra Mustafa Kamal melenzüktsü mejangrar” ta paisa shisem.
MQM aser muhajir nungertem jenjang raksaogo ta ashidang Musharraf-i “muhajir nungertemi kin tangatetba nung yimten mapa inyakba anentsüla aser PAI den adentsüla” ta metetdaktsü.
Pakistan Muslim League-Quaid lennirtem- Chaudhry Shujaat aser Chaudhry Pervez Elahi natia par teloktep nung adentsü imlar, ta paisa ashi.
“Pakistan tejaklen anir aotsü atema Pakistan Tehhreek-i- Insaf (PTI) chairman Imran Khan-ia ozü telok den adentsüla” ta paisa shisem.
Musharraf-i pa kobi melii Pakistan-i arutsü aser linük nung tensa tajungba kümerji security menüngdaker ta ashi.
Pakistan interior ministry-i pa tenüng exit control list (ECL) nungi agientsü tetuyuba agütsüba sülen yaküm March ita Musharraf-i Pakistan toktsür Dubai nung oa jenok.
Yaküm special court kati Musharraf-i linük anema inyakba aser Benazir Bhutto tepsetba ken o nung pa jenshir ta sangokja liasü saka pai ashiba agi, “tangbo Pakistan nung okadaktem Nawaz Sharif indang tazüokba nung mali, anungji ni ken o tem atema nokdaktsü renema lir.”