Pope Francis-i Lesbos nung jenoka alir migrant nisungtem den ajurutep

Pope Francis-i Lesbos nung jenoka alir migrant nisungtem den ajurutep

Greek Orthodox Ecumenical Patriarch, Bartolomew I (Abelen) aser Greece Ato Kilonser, Alexis Trispras (Achijilen) nati Pope Francis Greece kübok Lesbos asetkong nung pela agizükba noksa nung angur. (Lesbos, April 16)

Mytilene, April 16 (Agencies): Alima ajunga nung Roman Catholic tamangba yimsü benshir lenisang, Pope Francis-i Lesbos asetkong nung tentetba Moria jenokdak tanü, Honibar nü semdangogo.
Lesbos asetkong ya Greece anüdoklen, Aegean Sea nung asetkong ka lir.
Moria jenokdak jenoka alir migrant-temi Francis den ajurutepba sülen pa dang teyari meshia liasü.
European Union (EU)-i telemtetba ka agiba sülen Europe bushia aoba migrant nisung million jenti Europe-i modaktsüi Aegean Sea nung densemba Lesbos asetkong nung jenoka lidaktsüba osang jangjaogo.
Tesüiba World War II mapang ajuruba sülen Europe-i tan mezüngsüa ajuruba migrant nisungtem den sentakba khuret bentettsü asoshi EU aser Turkey nati tashishitsü aketba tezüngzüktep agiba mapang ka nung Francis-i tan Lesbos asetokong semdanger lir.
Ozüngi melaba ama temelaba magi Greece nung jenoker migrant nisungtem Turkey-i yokba melena Turkey nung jenoka alir migrant nisungtem nem Europe nung jenoka alitsü tenüng züluoktsü maongka agütsütsü aser Turkey EU nung züngsemtsü maparen tekaraba mapang nung inyaktsütsü asoshi EU aser Turkey nati tezüngzüktep agia lir.
Ajisüaka, iba tezüngzüktep agiba ajanga EU aser Turkey nati migrant nisungtem meimchir ama mezüngoker ta shia, meimchir temeten asoshi nokdakbapurtemi tezüngzüktep agiba maparenji aija lir.
Christian Orthodox Church, Ecumenical Patriarch Bartholomew aser Greece Tir, Prokopis Pavlopoulos nati jaokba sülen Francis-i tan Lesbos asetkong semdangba osanga angazükogo.
Francis den külemi, Bartholomew; Athens & All Greece nung Archbiship, Jerome II natia Lesbos asetkong semdanga liasü.

You must be logged in to post a comment Login