Priyanka, Taylor Swift, Josh Groban nungeri mangyimer

November 02, 2017: New York nung nisung kati Lower Manhattan tesem amakba sülen actress, Priyanka Chopra, kentener Taylor Swift, Josh Groban aser Ryan Seacrest nunger densema nüngtugu nisung aikati iba tatalokba aitsüogo.
US nung prangpong bener nisung kati truck nung mener nisung 8 menüngsetba den nisung 11 yirutsü, aser iba ya kiralongraba maparen ka liasü.
Iba tatalokba ya Priyanka Chopra’er kidang nungi block pongu dang pilar atalok, aser lai iba tatalokba aija twitter ajanga, “NYC… ni na meimer. Iba tatalokba ajanga takoksa angur ajak den ni mangyim lemsateper,” ta ashi.
Laisa tanga tweet ka nung, “Iba tatalokba ya ozü kidang nungi block pongu pilar atalok. Ni mapa nungi kidangi shilangdang ‘siren’ ola ajanga, tang alima iba tia nung lir ta ni maneni rajem,” ta ashi.
Kentener Taylor Swift-ia Instagram Story nung tejashi noksa ka nung yamai zülur lemsatep, ‘Ni na meimer New York’.
Ano kentenersa Josh Groban-ia, pai prangpong ola angashiaba sülen par zü den külemi kimai ayazüka alu.
“Ajak junga alitsü südi ta ni amanger. Iba tatalokba ya ni aliba nungi block tesadang ka dang orr atalok, ni mangu, saka injang round 8-10 shi angashi. Nenok chinurtem kümzüka liangma,” ta pai lemsatep.
Zoe Saldana-ia twitter ajanga, “Ni mulung raksar. Tanü NYC nung taküm samara ajak atema sarasademtsür,” ta ashi.
Kentener Sam Smith-ia twitter ajanga, “New York. Kü melungjang nenok den teti lir. osang kanga tamajung. Kü tanela aser melungjang takoksa angurtem aser parnok kinüngertem den lir,” ta lemsatep.
Temulung melemteti alisang, arishi küm 29, Sayfullo Habibulaevic Saipov dakji tebok nung akhaba sülen police-i puer ao.