Pungmang ajasa

–  Temjentenzük, Kohima.

“Nai shitakba ni doktsür onür süra, ne zü kü dak tanglokjang”, ta shia la temulung kanga raksa. Lai pa dak azüiter imlibilema nai ni tedoktsü ta mepishia ajebdang la tenük meremmerema küma wakadok. Lai pa nem ajak agütsü. Paia la nem ajak agütsü. Tena tsüngda nung menungra bilemtetsüsa tatalokba aika liasü. Iba ama tia ajurutsü tenapronglai meyimla! Tang joko tena pungmang ajak jaksadokogo. Tena tsüngda tezüngzüktepba ajak furep ama kümogo!
Paia la dak nüktzü yima azüit aser animesüngzükteti talangka ali! Pai meyirijang aika la dang shina bilem saka pa tebang nungi “tia” dak alaka tanga ojang kecha madokteti talangka tenük amur ali! Mapang ka nungbo la atema paji rangpen lung tulu ka ama, yipru mopung ajak nungi kümzüka lia aru. Mapang ka nungbo laji pa atema chubar jala ka ama, shiba atema pai pa taküma bendanga agütsütetsüsa liasü. Saka tangbo pai kecha mesüteti kümogo!
“Nai tangar tetsür agiyonga nibo nasa atatsü. Kechiyong kü tamangi künübo na kü dangi tanaben meyipa arudaktsütsü”, ta shia la kanga ajeb. Pai la nungi tatembangtiba o angashibaji iba ya liasü. Pai la temulung raksaba talangka repranga melitet. La anüngba ola jagi pa temulungjang kanga yimsadaktsü.
Pai la den shingaia memetetba topur tajung lima kati jena oadoknüa bilem. Tena temeim tenüng nung pai ajak akoktsü ta bilem. Pai la den külemi iba lima doktsütsüba tashi yimdangi aru! Saka kodang par kidang tsürabur adianu bilema arudir pa azülaa kecha mesüteti aküm. Temeimtsüka, asanguba tsüraburtemi iba tetsürla agitsü kanga memelungi liasü.
Nüktzü agi tzüngbanger, pai la topur tajung tejak nungji meimshia ashi, “ni na meimer”. Au, atangji pai la kang dang meima liasü. Pa nükdang alima nung tetsür ajak rongnung la sa tajungtila liasü. “Ya tarutsü nungbo kü kinungtsü asütsü” ta pai par medemertem den asaya menü ama, ochi o pa temulungjang ajak nungi jembia la parnok den metettepdaktsüli ta pelatepba aru. Saka tangbo pa tanur tila ka memeyongi kecha mesüteti kümogo. “Na kibong akümba anogoji obala alima nungi pilaba anogo asütsü” ta tebui ashiba o mapang shia bilemtetang, pa mulung nung tzürema aitdaktsü.
Joko Endir aser Yongla tena ajuruteper küm asem sür ita pezü süia arur. Tena temeim ya mezüng nguyutepba mapang nung sakloktepba kümer, meimtepba akümba temeim liasü.
Honibar nü college nung parnok ‘freshers social’ mapang, Endiri, Yongla mezüng anguba anogoji iba ya liasü. Iba anogo nungi pa temulung nung kanga animesüngzükteti aküm. Deobar anogo süia aoba matateti hombar nü college-i aotsü yongya ata! Hombar nü college nung pa temulung toktoka la aru ata liasü. Kodang Yongla aruia angu pai menürema la den “good morning” ta salem asü aser pai la takabu nung tanemi anakshi! Yongla temang ajak nung ‘zing’ ta light current arur ama aküm aser la takabu asentzü agi asüng. La tejak ‘nasik bingkana’ tamen ama meremmerema kümer menürema angudang, Endir anisüngzük tulu angu! Pai la takabu ano ama lia, tena nüknürar anogo (Valentine’s Day) nung class mapang temer 3:00 pm nung college moapu nung ajuruteptsü asüngdang. Yonglai menürema “okay” ta langzür ilunga class taktangi iadok.
Endir takar kibong ka nungi liasü. Awashi metetba aser lokti mapa nung tedangshi asangur ka.
Parnok adianu tebur dang asem rongnung pa talakba aser talangba liasü. Pa tar feet pongu sür inch tuko tera agi alia liasü. Pa soro tajung, sentsü temesüng achaket asangur ka liasü.
Endir aser Yongla tena ajurutepba anogoji Tsüngremi yangluba angotem tajungtiba rongnung ka liasü. Tzünglu aruzükli, nikongdang mapang ka, tongnüsen tebur junga adoker lia, mopung anüka aonba den külemi teronem tajung arua moapu ajak sünga tena peladaktsü. Alima yimyaia Endir aser Yongla tena ‘temeim otsü züluba limai’ anioker ama sayu. Tatsüka lirbo tenati merükmerüka aliba anüng nung ita aser petinutem tesüngmangtsü topur junga adoka angutsü yimlaa, college moapu nungji mapang aoba memeteti tena mena liasü. Iba ama tesüngjem anogoji Endir aser Yongla ama tenükshitsü nüknürar atema Tiatsüri mapang talangka tejaklen renematsüba ka liasü.

(Maneni taruba adok nung…)